काठमाडौं । इंग्लिस प्रिमियर लिगमा साविक विजेता म्यानचेस्टर सिटीले लगातार तेस्रो जित निकालेको छ । सिटीले आइतबार राति सम्पन्न खेलमा सेफिल्ड युनाइटेडविरुद्ध २-१ को रोमाञ्चक जित निकाल्यो । 

सिफिल्डको मैदान ब्रामल लेनमा सिटीलाई जित दिलाउन एर्लिङ हाल्यान्ड र रोड्रीले गोल गरे । घरेलु टिमका लागि जयडेन बोग्लेले एक गोल फर्काएका थिए ।

हाल्यान्डले ६३औं मिनेटमा गोल गर्दै सिटीलाई अग्रता राखेका थिए । तर, ८५औं मिनेटमा जयडेन बोग्लेले गोल गर्दै सेफिल्डलाई खेलमा फर्काए ।

खेलको निर्धारित समय सकिन दुई मिनेट बाँकी रहँदा रोड्रीले गोल गर्दै सिटीलाई पुन: २-१ को अग्रतामा राखेका थिए । रोड्रीको यही गोल निर्णायक बन्दा सिटीले तीन अंक निश्चित गर्यो । 

त्यसअघि, ३७औं मिनेटमा प्राप्त पेनाल्टी हाल्यान्डले सदुपयोग गर्न नसक्दा सिटीले अग्रता बनाउने अवसर गुमाएको थियो । जितसँगै तीन खेलबाट नौ अंक जोडेको सिटी तालिकाको शीर्ष स्थानमा छ । समान खेल खेल्दा पनि अंकविहीन सेफिल्ड तालिकाको १७औं स्थानमा छ । 

आइतबार राति नै भएको अर्को खेलमा एस्टोन भिल्लाले बर्न्लीविरुद्ध ३-१ को जित निकालेको छ ।