काठमाडौं । नेपालको विद्युत् प्रसारण प्रणालीमा विगत नौ वर्षमा तीन हजार ११८ किलोमिटर सर्किट प्रसारणलाइन थपिएको छ ।

नेपाल विद्युत् प्राधिकरणका अनुसार विगत नौ वर्षमा ग्रीड सबस्टेसनहरूको क्षमता आठ हजार ८६७ एमभीए पुगेको छ । नौ वर्षअघि अर्थात् आर्थिक वर्ष २०७१/७२ मा सबस्टेसनहरूको क्षमता दुई हजार १३२ एमभीए थियो । आव २०७९/८० मा आइपुग्दा सबस्टेसनहरूको क्षमता ६ हजार ७३५ एमभीए बढेको हो ।

आव २०७१/७२ मा ६६ र १३२ केभीबाट मात्र विद्युत् प्रसारण भइरहेकामा अहिले ६६, १३२, २२० र ४०० केभी लाइनहरू सञ्चालनमा छन् ।

आव २०७१/७२ मा दुई हजार ६२४ सर्किट किलोमिटर प्रसारणलाइन रहेकामा हाल पाँच हजार ७४२ सर्किट किलोमिटर पुगेको प्राधिकरणले जनाएको छ ।

आव २०७२/७३ सम्म ६६ र १३२ केभी लाइन मात्र प्रसारणलाइन रहेकामा आव २०७३/७४ बाट २२० र ४०० केभी प्रसारणलाइन सञ्चालनमा आएका हुन् । अहिले प्रणालीमा ६६ र १३२ केभी प्रसारणलाइनको लम्बाइ क्रमशः ५१४ र तीन हजार ९७९ सर्किट किलोमिटर छ ।

यस्तै, २२० र ४०० केभी प्रसारणलाइनको लम्बाइ क्रमशः एक हजार १०१ र १४८ सर्किट किलोमिटर छ ।

प्राधिकरणका अनुसार हाल विभिन्न क्षमताका दुई हजार ८५२ सर्किट किलोमिटर प्रसारणलाइन निर्माणाधीन छन् । सबैभन्दा बढी १३२ केभीको एक हजार १११ सर्किट किलोमिटर प्रसारणलाइन निर्माणाधीन छन् ।

यसैगरी, २२० र ४०० केभीको क्रमशः ९८८ र ७५४ सर्किट किलोमिटर प्रसारणलाइन निर्माणाधीन छन् ।

६ हजार ७५१ सर्किट किलोमिटर निर्माण अगाडि बढाउन प्रस्ताव गरिएको छ । १३२, २२० र ४०० केभीका क्रमशः एक हजार १४१, एक हजार ७५२ र तीन हजार ८५८ सर्किट किलोमिटर प्रसारणलाइन निर्माण प्रस्ताव गरिएको हो ।

विभिन्न क्षमताका १० हजार ४६९ एमभीए क्षमताका सबस्टेसनहरू निर्माणाधीन छन् । १५ हजार ५६४ एमभीए क्षमताका सबस्टेसनहरू निर्माण प्रस्ताव गरिएको प्राधिकरणले जनाएको छ ।