काठमाडौं । प्रधानन्यायाधीश विश्वम्भरप्रसाद श्रेष्ठले प्रधानन्यायाधीशका रुपमा आजदेखि जिम्मेवारी सम्हालेका छन् ।

मंगलबार नियुक्त भएर शपथ लिएका श्रेष्ठले मंगलबार नै कार्यभार ग्रहण गरेका थिए । आजदेखि उनले औपचारिक रुपमा नेतृत्व सम्हाल्दै जिम्मेवारी सुरु गरेका हुन् ।

श्रेष्ठले प्रधानन्यायाधीशका रुपमा जिम्मेवारी सम्हालेकै दिन संवैधानिक इजलास बसेको छ । संवैधानिक इजलासमा बुधबार १९ मुद्दा छन् । त्यसमध्ये पाँचवटामा खाजा समयअघि नै सुनुवाइ भइसकेको छ ।

सर्वोच्चको पेसी सूचीमा पाँच मुद्दाको सुनुवाइ भइसकेको जनाइएको छ । कार्यभार सम्हालेपछि मंगलबार प्रधानन्यायाधीश श्रेष्ठले सर्वोच्चमा रहेका पुराना मुद्दाको चाप घटाउने बताएका थिए ।

उनले जिल्ला र उच्च अदालतमा पुराना मुद्दा नरहेको भन्दै सर्वोच्चमा मात्र पुराना मुद्दाको चाप धेरै रहेको बताएका थिए । न्यायाधीश नियुक्ति चाँडोभन्दा चाँडो गर्ने र सुनवाइलाई पनि तीव्रता दिएर पुराना मुद्दाको चाप घटाउने उनको कार्ययोजना छ ।