काठमाडौं । नेकपा (एकीकृत समाजवादी)की सांसद मदनकुमारी शाहले सुन तस्करी प्रकरणको छानबिन राज्यका संयन्त्रहरूले नै गर्नुपर्ने बताएकी छन् ।

मंगलबार राष्ट्रियसभा बैठकमा बोल्दै सांसद शाहले सुन तस्करी प्रकरणको छानबिन राज्यका निकायहरूले नै गर्नुपर्ने बताइन् । उनले सीआईबीलाई छानबिन गर्न दिइनु ठिक भएको बताइन् ।

राज्यका संयन्त्र र संरचनालाई विश्वसनीय, जिम्मेवार र बलियो बनाउनु सबैको दायित्व भएकाले सरकारी संयन्त्रहरूलाई विश्वास गर्नुपर्ने उनको भनाइ छ ।

उनले हरेक अपराधको अनुसन्धान आयोगबाट नै गर्ने हो भने राज्यका सम्बन्धित संयन्त्रहरूको कुनै काम नहुने बताइन् । अपराध अनुसन्धानमा संविधानले बनाएका संरचना र संयन्त्रहरूलाई परिचालित गर्नुपर्ने र तिनलाई बलियो बनाउनुपर्ने उनको भनाइ छ ।

उनले भनिन्, "सुन काण्डमा दोषी जो कोही भएपनि सजाय पाउनुपर्छ । त्यसका लागि सीआईबीलाई छानबिन गर्न दिनेकुरा ठिक छ । राज्यका संयन्त्र र संरचनालाई विश्वसनीय, जिम्मेवार र बलियो बनाउनु हामी सबैको दायित्व हो । किनकी ती संस्थाहरू हामीले नै निर्माण गरेका हौँ । आफैँले निर्माण गरेका संस्थाहरूलाई अविश्वास गर्न पुग्यौँ । कमजोर बनाउन पुग्यौँ भने के सधैँ आयोगहरूले त्यस्ता समस्याहरूको निरुपण गर्न सक्छ ? तसर्थ म के अनुरोध गर्न चाहन्छु भने हामी आफैँले बनाएका संस्थाहरुमाथि विश्वास गर्न सिकौँ । विश्वास गरौँ । बलियो बनाऔँ ।"