काठमाडौं । प्रधानमन्त्री पुष्पकमल दाहाल ‘प्रचण्ड’ले नयाँ भरतपुर २२०/१३२ केभी सबस्टेसनको उद्घाटन गरेका छन् । उनले हेटौँडा–भरतपुर–बर्दघाट २२० केभी डबल सर्किट प्रसारणलाइनको पनि उद्घाटन गरेका छन् ।

चितवनको भरतपुर महानगरपालिका–११, आँपटारीमा निर्मित सबस्टेसनको मंगलबार प्रधानमन्त्री प्रचण्डले उद्घाटन गरेका हुन् ।

नेपाल सरकार तथा नेपाल विद्युत् प्राधिकरणको लगानी र युरोपेली लगानी बैंकको सहुलितपूर्ण ऋणमा सबस्टेसन र सरकार तथा प्राधिकरणको लगानी र विश्व बैंकको सहुलितपूर्ण ऋणमा हेटौँडा–भरतपुर–बर्दघाट २२० केभी प्रसारणलाइन निर्माण गरिएको हो । सबस्टेसनको लागत एक अर्ब ५२ करोड  र प्रसारणलाइनको लागत पाँच अर्ब ९४ करोड रुपैयाँ रहेको छ ।

सो कार्यक्रममा प्रधानमन्त्री प्रचण्डले उक्त सबस्टेसन र प्रसारणलाइन पूर्वपश्चिम विद्युत् आपूर्तिका लागि रणनीतिक महत्त्वको रहेको बताए । देशभित्र उत्पादित विद्युत् यहीँ खपत गरी नागरिकको जीवनस्तर सुधार, विकासमा तीव्रता र विद्युत् निर्यात गरी अर्थतन्त्रलाई समृद्ध बनाउने गरी काम भइरहेको उनले उल्लेख गरे ।

“एउटा छिमेकी देश भारतसँग १० वर्षमा १० हजार मेगावाटको विद्युत् व्यापार गर्ने प्रारम्भिक सम्झौतामा हस्ताक्षर भएको छ । यसलाई चाँडै अन्तिम हस्ताक्षर गर्दै छौँ । नेपालको विद्युत् बंगलादेशसम्म पुर्‍याउन तीन देशबीच सैद्धान्तिक सहमति भइसकेको छ,” उनले भने, “अर्को छिमेकी देश चीनको भ्रमणमा छिट्टै जाँदै छु । चीनसँग प्रसारणलाइन र विद्युत् व्यापारका विषयमा सम्झौताहरू हुँदै छन् । यसबाट देशको अर्थतन्त्रमा ठूलो सहयोग पुग्नेछ ।”

१,२०० मेगावाटको बूढीगण्डकी जलाशययुक्त जलविद्युत् आयोजना र १०,८०० मेगावाटको कर्णाली चिसापानी आयोजनालाई अद्यावधिक अध्ययन गराउन औचारिक रूपमा प्राधिकरणलाई दिन लागिएको उनले बताए ।

उद्घाटन गरिएको हेटौँडा–भरतपुर–बर्दघाट २२० केभी प्रसारणलाइनको लम्बाइ करिब १४७ किलोमिटर छ । एक हजार मेगावाटसम्म विद्युत् प्रवाह गर्न सक्ने प्रसारणलाइनलाई हेटौँडा–भरतपुर र भरतपुर बर्दघाट दुई खण्डमा विभाजन गरी निर्माण गरिएको थियो ।

मकवानपुरको हेटौँडा उपमहानगरपालिका चौकीटोलस्थित पुरानो हेटौँडा सबस्टेसनबाट नयाँ भरतपुर सबस्टेसनसम्मको २२० केभी डबल सर्किट प्रसारणलाइनको एउटा सर्किटलाई १३२ केभीमा चार्ज गरिएको छ ।

दोस्रो खण्डअन्तर्गत नयाँ भरतपुर सबस्टेसनबाट सुरु भई नवलपरासी (बर्दघाट सुस्ता पूर्व)को बर्दघाट सबस्टेसनमा अन्त्य हुने ७४ किलोमिटर २२० केभी डबल सर्किट प्रसारणलाइनलाई हाल १३२ केभीमा सञ्चालन ल्याइएको छ ।