विराटनगर । कोसी प्रदेशका केही जिल्लामा महामारीका रूपमा फैलिएको डेंगी रोग नियन्त्रण गर्न पहल थालिएको छ । खासगरी सुनसरीको धरान उपमहानगरपालिकामा फैलिएको डेंगी नियन्त्रणका लागि प्रदेश सरकार अग्रसर भएको हो ।

कोसी सरकारका मुख्यमन्त्री उद्धव थापाले धरानका प्रमुख राजनीतिक दल र नागरिक समाजका तर्फबाट माग भएबमोजिम स्वास्थ्य सामग्री उपलब्ध गराउने कार्य सुरु गरिएको बताए ।

“प्रदेश स्वास्थ्य मन्त्रालयसँग १० लाख रुपैयाँ मात्र बजेट रहेछ । यतिले त केही पनि हुँदैन भन्ने देखिएकोले अर्थ मन्त्रालयसँग थप माग गरिएको छ,” उनले भने ।

औषधि उपचारको व्यवस्था गर्न संघीय सरकारसँग एक करोड रुपैयाँ माग गरिएको उनले जानकारी दिए ।

कोसी सरकारले मुख्यमन्त्रीको संयोजकत्वमा रहेको विपद् व्यवस्थापन समितिमार्फत स्प्रे गर्ने मेसिन खरिद प्रक्रिया अघि बढाउने निर्णय गरिसकेको छ । सोअनुसार १०० थान मेसिन धरानमा पठाउने तयारी गरिएको जनाइएको छ ।

“विपद् व्यवस्थापन समितिबाट १०० थान स्प्रे मेसिन खरिद गरेर धरान उपमहानगरलाई एक हप्ताभित्र दिइनेछ,” मुख्यमन्त्री थापाले भने ।

प्रदेशसभा सदस्यहरूले समेत धरानको समस्याबारे सदनमार्फत सरकारको ध्यानाकर्षण गराएका थिए ।

धरानमा डेंगी नियन्त्रणका लागि तत्काल २५ लाख रुपैयाँबराबरको स्वास्थ्य सामग्री माग गरिएको छ । ती सामग्री दिने गरी प्रदेश सरकारले तयारी थालेको मुख्यमन्त्री तथा मन्त्रिपरिषद्को कार्यालयले जनाएको छ ।

यसैबीच, प्रदेश सरकारले कोरोना संक्रमणका बेला विराटनगरमा सञ्चालन गरेको कोभिड अस्पताललाई डेंगी उपचार केन्द्रका रूपमा प्रयोग गर्ने निर्णय गरेको छ । यो उपचार केन्द्र निर्माण गर्न विराटनगरका उद्योगी, नागरिक समाज र सरकारका तर्फबाट संयुक्त रूपमा लगानी गरिएको थियो ।

यो अस्पतालमा ४६ भेन्टिलेटर छन् । एक हजार बेड छन् । त्यहाँ स्वास्थ्यकर्मी र सहयोगी कर्मचारीको व्यवस्था गरिएको स्वास्थ्यमन्त्री निर्मला लिम्बूले जानकारी दिइन् ।

उनले भनिन्, “आवश्यक परे थप सुविधा दिइनेछ । डेंगीका गम्भीर किसिमका रोगीको उपचार गर्न केन्द्रले सुविधा उपलब्ध गराउनेछ ।”

यसलाई प्रदेशस्तरीय सरुवा रोग उपचार केन्द्रका रूपमा विकास गर्ने तयारी गरिएको स्वास्थ्य मन्त्रलयले जनाएको छ ।

तीन महिनायता धरान डेंगीको ‘हटस्पट’ बनेको छ । उपमहानगरको स्वास्थ्य महाशाखाको तथ्यांकानुसार हालसम्म धरानमा डेंगीका कारण १२ जनाको मृत्यु भएको छ ।

सोमबारसम्मको तथ्यांकानुसार धरानमा १७ हजार ९१३ जनामा डेंगी परीक्षण गरिएको छ । तीमध्ये १२ हजार ९७१ जनामा संक्रमण पुष्टि भएको छ । धरानमा संक्रमणको दर ७२ प्रतिशत छ ।