काठमाडौं । पूर्वसभामुख तथा नेकपा (एमाले) संसदीय दलका उपनेता सुवास नेम्वाङले संसद् अवरोध नियमसंगत नभएको बताएका छन् । उनले संसद्मा भएको अवरोध ‘जस्टिफाई’ हुनुपर्ने बताए ।

धुलिखेलमा भएको संसद्–सञ्चार सम्बन्ध विषयक कार्यक्रममा नेम्वाङले संसदीय अभ्यासमा संसद्् अवरोध देखिँदै आएको बताए ।

“मेरो प्रस्ट मान्यता छ । संसद्मा अवरोध नियमसंगत हैन । संविधान र नियमसंगत हैन । स्पष्ट छ,” उनले भने, “राजनीतिक दलले अवरोध गर्छन् । भारतमा आँखा झिम्काउनेदेखि ‘फ्लाइङ किस’सम्मको बिबाद हुँदो रहेछ । हाम्रोमा पनि अवरोध हुने कुरा छ ।”

उनले संविधान निर्माणताका अवरोध नगरौँ भनेर आफूले छलफल गराएको स्मरण गरे । त्यतिबेला संविधानसभा अवरोध नहुने, व्यवस्थापिकामा चाहिँ अवरोध हुने गरेको उनले सम्झिए । भने, “त्यो बेला सोफा नफुटेको त हैनन्, गलबन्दी लगाएर साथीभाइहरू उडेर नआएको हैन । खुर्सानीको धुलोसम्मको कुरा आयो ।”

उनले अवरोध नियमसंगत नभएको बताए । उनका अनुसार राजनीतिक दलहरूले अवरोध गर्छन् । तर, राजनीतिक दलहरूले गर्ने अवरोध सोही दलले जस्टिफाई गर्नुपर्छ ।

अहिले एमालेले गरेको संसद् अवरोध ठिक कि बेठिक त ? भन्ने प्रश्नमा उनले सरकारले प्रतिपक्षको कुरा सुन्नुपर्ने बताए । बहुमत ल्याउनेले सरकार चलाउने भए पनि अल्पमतको प्रतिपक्षले प्रभावकारी ढंगले कुरा राखेपछि कुरा सन्नुपर्ने उनको भनाइ छ ।

उनले भने, “अहिले मेरो दल एमालेले संसद् अवरोध गरेको छ । त्यसलाई मेरो दलले जस्टिफाई गर्नुपर्छ । फेरि भन्छु– अवरोध नियमसंगत हैन, अवरोध हुन्छ नै । तर, दफहरूले जस्टिफाई गर्नुपर्छ ।”