काठमाडौं । वैदेशिक रोजगार विभागले दुई मेनपावर कम्पनीलाई कारबाही गरेको छ । विभागले म्यापिटल रिक्वायरमेन्ट सर्भिस र इगल मेनपावर मेनपावर कन्सलटेण्टलाई चार लाख रुपैयाँ जरिबाना गरिएको हो ।
विभागले रिक्वायरमेन्ट सर्भिस र इगललाई दुई लाख रुपैयाँका दरले जरिबाना गरेको हो । यी मेनपावरले विभागबाट स्वीकृतिविना अवैध रूपमा फेसबुकबाट विज्ञापन गर्दै पासपोर्ट संकलन गरेको बताइएको छ ।
यसैगरी, वैदेशिक रोजगार ऐनको दफा ४३ विपरीत वैदेशिक रोजगारीसँग सम्बन्धित विज्ञापन सामाजिक सञ्जाल (फेसबुक, टिकटक) मा प्रकाशन गरी सर्वसाधारणमा भ्रम सृजना गर्ने सुयान एजुकेशन प्रा.लि., ललितपुर र एलाईट टू वर्क ह्युमन रिसोर्सेस हस्पिटालिटी एन्ड ट्रेनिङ सेन्टर, ललितपुरको स्थलगत अनुगमन गरी थप विषयमा अनुसन्धान कार्य जारी रहेको विभागले जानकारी दिएको छ ।
वैदेशिक रोजगारीमा जानेहरूलाई सामाजिक सञ्जालमा प्रसारण हुने भ्रमपूर्ण विज्ञापनमा विश्वास नगर्न पनि विभाग अनुरोध गरेको छ ।
