काठमाडौं । मल्टीपर्पस फाइनान्सले आउँदो भदौ १० गतेदेखि हकप्रद सेयर निष्कासन गर्ने भएको छ । कम्पनीले हाल कायम चुक्तपुँजीको ३५ प्रतिशत प्रतिकित्ता १०० रुपैयाँअंकित मूल्यमा लगानीकर्तालाई हकप्रद बिक्री गर्न लागेको हो ।

१०० कित्ता सेयर हुने सेयरधनीले ३५ कित्ताका लागि आवेदन दिन सक्नेछन् । फाइनान्सको हकप्रद सेयरमा भदौ ३१ गतेसम्म आवेदन दिन सकिनेछ ।

यही साउन ११ गतेसम्म कम्पनीको सेयर खरिद गरी नेपाल स्टक एक्सचेन्ज (नेप्से)मा सूचीकृत सेयरधनीले यो हकप्रदमा आवेदन दिन सक्नेछन् । कम्पनीले हकप्रद निष्कासनका लागि साउन १२ गते बुक क्लोज गरेको थियो ।

कम्पनीले हाल कायम चुक्तापुँजी ४५ करोड २० लाख रुपैयाँको ३५ प्रतिशत अर्थात् १५ करोड ८२ लाख रुपैयाँबराबरको प्रतिसेयर १०० रुपैयाँअंकित मूल्यका १५ लाख ८२ हजार कित्ता हकप्रद सेयर निष्कासन गर्नेछ ।

कम्पनीको सेयर निष्कासन तथा बिक्री प्रबन्धक मुक्तिनाथ क्यापिटल लिमिटेड रहेको छ । लगानीकर्ताले मुक्तिनाथ क्यापिटल, मल्टीपर्पस फाइनान्स र मुक्तिनाथ विकास बैंकका तोकिएका शाखा कार्यालयहरूबाट आवेदन दिन सक्नेछन् ।

नेपाल धितोपत्र बोर्डबाट अनुमति लिई आस्वा सेवामा सहभागी बैंक तथा वित्तीय संस्थाहरूबाट सी–आस्वा प्रणालीमार्फत र सीडीएस एन्ड क्लियरिङबाट निर्माण गरिएको सफ्टवेयर मेरोसेयर अनलाइन प्रयोग गरी पनि आवेदन दिन सकिनेछ ।

हकप्रद निष्कासनका लागि गराएको रेटिङमा इन्फोमेरिक्स क्रेडिट रेटिङ नेपालले फाइनान्सलाई ‘आईआरएन सिंगल बी इस्युअर’ रेटिङ प्रदान गरेको छ । यसले समयमा वित्तीय दायित्व वहन गर्ने क्षमतामा उच्च जोखिम रहेको संकेत गर्छ ।