काठमाडौं । इन्टरनेट रेजिलियन्स अथवा लचिलोपनामा नेपाल दक्षिण एसियामा पाँचौँ स्थानमा परेको छ । गैरनाफामूलक संस्था इन्टरनेट सोसाइटीले मंगलबार यस्तो रिपोर्ट सार्वजनिक गरेको हो ।
फल्ट र अपरेसनसम्बन्धी सामान्य चुनौतीबीच रेजिलियन्ट इन्टरनेट कनेक्सनले सेवाको स्वीकार्यस्तर कायम गर्ने सोसाइटीले जनाएको छ ।
स्वीकार्यस्तरको मापन भने पूर्वाधार, पफर्मेन्स, सुरक्षा र बजार तत्परताको विश्लेषणका आधारमा गरिएको रिपोर्टमा उल्लेख छ । रिपोर्टअनुसार नेपालले इन्टरनेटको लचिलोपनामा ४३ प्रतिशत स्कोर पाएको छ ।
यो सूचीमा नेपाल दक्षिण एसियामा पाँचौँ स्थानमा छ । दक्षिण एसियामा नेपालभन्दा अगाडि भुटानको ५८ प्रतिशत, बंगलादेशको ५१ प्रतिशत, माल्दिभ्सको ५० प्रतिशत र श्रीलंकाको स्कोर ४७ प्रतिशत छ ।
नेपालभन्दा पछाडि भारतको पनि ४३ प्रतिशत, पाकिस्तानको ३५ र अफगानिस्तानको स्कोर ३० प्रतिशत छ ।
इन्टरनेट जडानका लागि आवश्यक भौतिक पूर्वाधार र प्रयोगकर्तालाई निर्बाध र भरपर्दो इन्टरनेट प्रदान गर्ने नेटवर्कको क्षमता भए/नभएका आधारमा स्कोर दिइएको छ ।
इन्टरनेट सेवाको सुरक्षा प्रविधि र सुपथ मूल्य प्रदान गर्ने प्रतिस्पर्धी बजार भए/नभएको विषयलाई पनि आधार बनाइएको रिपोर्टमा उल्लेख छ ।
