काठमाडौं । इंग्लिस क्लब टोटनहमले नेदरल्यान्ड्सका रक्षक मिकी भान डे भेन र अर्जेन्टिनाका फरवार्ड एलेहो भेलिजलाई अनुबन्ध गरेको छ ।

टोटनहमले २२ वर्षीय डे भेनलाई वुल्फ्सबर्गबाट ४० मिलियम युरोमा भित्र्याएको हो । यस्तै, अर्जेन्टिनाका भेलिज भने रोसारियो सेन्ट्रलबाट १३ मिलियम युरोमा टोटनहम भित्रिएको अन्तर्राष्ट्रिय सञ्चारमाध्यमहरुले खुलाएका छन् ।

दुवै खेलाडीलाई टोटनहमले ६ वर्षको सम्झौतासहित भित्र्याएको हो । यी दुई खेलाडी टोटनहमले यस समरमा भित्र्याएको चौथो र पाँचौँ खेलाडी हुन् । यसअघि टोटनहमले इंग्ल्यान्डका मिडफिल्डर जेम्स म्याडिसन, इटालियन गोलकिपर गुइलेमो भिकारियो र इजरायलका विंगर मानोर सोलोमोनलाई भित्र्याएको थियो ।

भान डे भेनले यसै समरमा भएको यू–२१ युरोपियन च्याम्पियनसिपमा नेदरल्यान्ड्सको कप्तानी सम्हालेका थिए । उनले गत सिजन बुन्डेसलिगामा ३३ खेल खेलेका थिए ।

अर्जेन्टिनाका भेलिज सन् २०१९ मा रोसारियो सेन्ट्रलमा अनुबन्धित भएका थिए । सन् २०२१ मा रोसारियो सेन्ट्रलको सिनियर टिमबाट ‘डेब्यू’ गरेका उनले अर्जेन्टिनाको शीर्ष डिभिजन लिगमा कुल ६२ खेल खेलेका छन् ।