काठमाडौं । नेपाली कांग्रेसको सांगठनिक सुदृढीकरण अभियानका लागि केन्द्रीय प्रतिनिधिहरू जिल्ला जान थालेका छन् । साउन २ देखि १० गतेसम्म बसेको केन्द्रीय समिति बैठकको निर्णयबमोजिम केन्द्रीय प्रतिनिधिहरू जिल्ला जान थालेको मुख्यसचिव कृष्ण पौडेलले जानकारी दिए । 

अभियान भोलिदेखि साउन ३० गतेसम्म सञ्चालन हुने छ । पार्टी प्रचार विभाग प्रमुख मीन विश्वकर्माले खटाइएकामध्ये लगभग ५० प्रतिशत केन्द्रीय प्रतिनिधिहरू जिल्ला पुगिसकेको जानकारी दिए । 

“५० प्रतिशत जति जिल्ला पुगिसक्नुभयो । १० दिनसम्म अभियान चल्ने भएकाले बाँकी रहेका साथीहरू पनि दुई–तीन दिनभित्र पुग्नुहुन्छ र आफ्नो काम सकेर आउनुहुन्छ,” उनले भने । 

सांगठनकि सुदृढीकरण अभियानलाई पार्टीले ‘पोलिटिकल अडिट’ भनेको छ । 

“नेपाली कांग्रेसको सांगठनिक सुदृढीकरणका लागि साउन २० देखि ३० आन्तरिक, भदौ १० देखि २४ समुदायमा कांग्रेस ‘राष्ट्रव्यापी अभियान’ सञ्चालन गर्ने निर्णय गर्दछ,” बैठक निर्णयमा लेखिएको छ । 

पार्टी सभापति शेरबहादुर देउवाले ७७ जिल्लाको १६५ वटै निर्वाचन क्षेत्रका लागि प्रतिनिधि खटाएका हुन् । उनले सहमहामन्त्रीदेखि केन्द्रीय सदस्य तथा पूर्वकेन्द्रीय सदस्यहरूलाई अभियानका लागि जिल्लामा पठाइएको छ ।

जिल्लामा खटिएका प्रतिनिधिले समग्र पार्टी गतिविधिबारे जानकारी लिने र प्रतिवेदन तयार गर्ने छन् । प्रतिवेदन केन्द्रीय समिति बैठकमा प्रस्तुत गर्ने तयारी कांग्रेसको छ । 

प्रतिनिधिहरूले विधान अनुसार पार्टी संरचना चले/नचलेको, बैठक बसे/नबसेको, बन्नुपर्ने समिति बने/नबनेकोलगायत विषयहरूको आधारमा प्रतिवेदन तयार पार्ने विश्वकर्माले बताए । 

पार्टीले सांसद नभएका सहमहामन्त्रीहरूलाई मात्र जिम्मेवारी दिएको छ । सोही व्यवस्था केन्द्रीय सदस्यको हकमा पनि लागु भएको देखिन्छ । पार्टीले केन्द्रीय प्रतिनिधिसँगै प्रदेश र जिल्लाका एक/एक जना पदाधिकारीलाई साथमा लिएर छलफल गर्ने र प्रतिवेदन तयार गर्ने विश्वकर्माले जानकारी दिए ।

“दुई वा दुईभन्दा बढी निर्वाचन क्षेत्र भएका जिल्लाहरूमा प्रदेश सभा क्षेत्रीय समितिसम्म पुग्छौँ । हामीसँग प्रदेशको प्रतिनिधि हुनुहन्छ । एकजना र एकजना जिल्लाको प्रतिनिधिहरू पनि हुनुहुन्छ । जिल्लाको प्रतिनिधि वडातहसम्म, प्रदेशको प्रतिनिधि पालिका तहसम्म जानुहुन्छ र हामी केन्द्रीय प्रतिनिधिहरू प्रदेश क्षेत्रीय समिति सम्म पुग्छौँ,” विश्वकर्माले भने, “वडा तहसम्म पुग्नेले जिल्लाम रिपोर्ट पेस गर्नुहुन्छ । प्रदेशसम्म पुग्नेले केन्द्रमा पेस गर्नुहुन्छ । अनि जिल्लाले पनि केन्द्रमा पेश गरेपछि संकलन केन्द्रमा हुन्छ र प्रतिवेदन प्रस्तुत हुन्छ ।”