काठमाडौं । नेकपा (एकीकृत समाजवादी)का अध्यक्ष माधव नेपालले समाजवादी मोर्चामा आउन सबैलाई आह्वान गरेका छन् । आइतबार च्यासलमा आयोजित समाजवादी मोर्चाको कार्यक्रममा उनले वामपन्थीहरुलाई एकीकृत बनाउने प्रयास भइरहेको बताए ।

त्यसले राम्रो सन्देश पनि दिएको उनको भनाइ छ । उनले मोर्चामा धेरैभन्दा धेरैलाई समेट्न चाहेको बताए । “हामी सकेसम्म धेरैभन्दा धेरैलाई समेट्न चाहन्छौँ । हामीले समेट्ने कुुरा गरेर मात्रै पुग्दैन । अरुले पनि चाहना राख्नुपर्छ,” उनले भने ।

अध्यक्ष नेपाालले आउनेले चाहना नराखे घिसारेर ल्याउन नसक्ने बताए । “अरुले चाहना राखेनन् भने हामी घिसारेर ल्याउन सक्दैनौँ । आफ्नो कुरा थोपर्न सक्दैनौँ । हामी सबैलाई मोर्चामा आउन आह्वान गर्दछौँ । आउनुस् बसौंँ,” उनले भने ।

उनले जनताको हितका लागि एकताबद्ध भएर अघि बढ्नुपर्ने बताए । उनले समाजवाद समानता, न्यायको परिपाटी र जनताको समृद्धिको नाम भएको समेत बताए ।

“नेपाल राष्ट्रको हितका लागि, नेपाली जनताको हितका लागि कस्तो नीति अवलम्बन गनुपर्छ, त्यसको निम्ति हामी मिलेर अघि बढौँ,” नेपालले भने, “देशलाई राम्रो बनाउनका लागि जनताले चाहना गरेबमोजिम पनि एकताको आवश्यकता छ ।”