काठमाडौं । राष्ट्रिय जनसाहित्यिक संघ, नेपालले आयोजना गरेको ‘अविरल जनसाहित्य यात्रा’को ८१औँ शृङ्खलामा कवि/लेखक महेशराज खरेलका एक दर्जन कविताहरू सुनिए ।

शनिबार काठमाडौंमा सम्पन्न कविता वाचन कार्यक्रममा कवि खरेलले आफूले विभिन्न कालखण्डमा अनुभूत गरेका विषयहरूलाई काव्यहरूमा उतारेको बताए ।

कवि खरेलले ‘चेतनाको गर्भबाट’, ‘पदमा बसेको मान्छे’, ‘संकल्प’, ‘नयाँ वर्ष’, ‘घरमै विद्रोह उम्रियो’, ‘म’, ‘बादल लागेपछि’, र अन्त्यमा ‘आमा’ शीर्षकको कविता वाचन गरे । कवि खरेलको आग्रहमा उनका अन्य कविता अनु शर्मा, डम्बर पहाडी, नन्दु उप्रेती र विन्दु ढकालले वाचन गरेका थिए ।

यसरी वाचन गरिएका खरेलका एक दर्जन कविताहरूमाथि प्रा. जगत् उपाध्याय ‘प्रेक्षित’ले समीक्षात्मक टिप्पणी गरे । कार्यक्रममा डा. हरिप्रसाद सिलवालले कवि परिचय दिएका थिए ।