काठमाडौं । एसिया कपको तयारीका लागि श्रीलंकामा रहेको नेपाली राष्ट्रिय क्रिकेट टिम पहिलो अभ्यास खेलमा स्थानीय ब्लुमफिल्ड क्रिकेट क्लबसँग ६ विकेटले पराजित भएको छ ।

बुधबार श्रीलंकाको कोलम्बोमा भएको खेलमा नेपालले प्रस्तुत गरेको १९८ रनको लक्ष्य ब्लुमफिल्डले २४.३ ओभरमा चार विकेट गुमाएर भेट्टायो ।

हसिथा बेयागोडाले ९० रन बनाए । आक्रामक रूपमा प्रस्तुत भएका बेयागोडाले ५३ बलमा समान सात चौका र छक्का प्रहार गरे । असहान फर्नान्डोले अविजित ५६ रन थपे । ओपनर सन्दुन विराकोदी ३१ रन थपे ।

नेपालका सूर्य तामाङ र प्रतिश जिसीले समान दुई विकेट लिए ।

त्यसअघि टस जितेर ब्याटिङमा आएको नेपालले ४३.३ ओभरमा सबै विकेट गुमाएर १९७ रनको योगफल खडा गरेको थियो ।

नेपालका अर्जुन साउदले ७९ रन बनाएका थिए । सन्दीप जोराले ३१, देव खनालले २२, प्रतिश जिसीले १६, सोमपाल कामीले ११ र पवन सर्राफले १० रन जोडे ।

ब्लुमफिल्डका ए वानिनायके, एन थारिदु, डी समाराविरा र एम परेराले समान दुई विकेट लिए । सी दिल्साराले एक विकेट लिए ।

एसिया कपका लागि श्रीलंकामा १५ दिनको विशेष तयारी गरिरहेको नेपालले त्यहाँ कुल चार अभ्यास खेल खेल्ने तालिका छ । नेपालले अब शुक्रबार पी सारा ओभलमा तामिल युनियनसँग दोस्रो अभ्यास खेल खेल्ने छ ।