काठमाडौं । धादिङको बेनीघाट रोराङ गाउँपालिका–३ मा ट्रकको ठक्करबाट मोटरसाइकल चालकको मृत्यु भएको छ । 

मृत्यु हुनेमा बीरगंजका २५ वर्षीय कृष्ण श्रीवास्तव रहेका छन् । दुर्घटनामा घाइते भएका उनको उपचारका क्रममा मृत्यु भएको जिल्ला प्रहरी कार्यालय धादिङका प्रहरी नायव उपरीक्षक (डीएसपी) सन्तुलालप्रसाद जैसवालले जानकारी दिए । 

काठमाडौंबाट चितवनतर्फ जाँदै गरेको प्रदेश–२–००१ ख ८०२९ नम्बरको ट्रकले विपरित दिशातर्फ आउँदै गरेको वाग्मती प्रदेश ०२–०३७ प ७७३१ नम्बरको मोटरसाइकललाई आज दिउँसो ३ः१५ बजे ठक्कर दिएको थियो ।

दुर्घटनामा मोटरसाइकलको पछाडि सवार लमजुङकी अस्मिता पाठक घाइते छिन् । उनको ललितपुरस्थित बी एण्ड बी अस्पतालमा उपचार भइरहेको छ । 

ओभरटेक गर्ने क्रममा ट्रकले मोटरसाइकललाई ठक्कर दिएको डीएसपी जैसवालले जानकारी दिए। ठक्कर दिने ट्रक र ट्रकका चालक प्रहरीको नियन्त्रणमा छ ।