काठमाडौं । काठमाडौंमा आज दिउँसो र साँझ वर्षाको सम्भावना रहेको छ । बिहान मौसम सामान्यत: सफा रहे पनि दिउँसो र साँझ भने वर्षा हुनेछ ।
“आज काठमाडौंमा वर्षाको सम्भावना रहेको छ । दिउँसोबाट वर्षाको सम्भावना रहेको छ,” मौसमविद् रोजन लामिछाने भन्छन्, “दिउँसो र साँझ वर्षाको सम्भावना रहेको छ ।” काठमाडौंमा आज भारी वर्षाको सम्भावना भने नरहेको उनले बताए ।
अहिले नेपालमा मनसुनी वायुको प्रभाव रहेको छ । मनसुनको न्यून चापीय रेखा पश्चिमतिर सरदर स्थानभन्दा दक्षिणतर्फ तथा पूर्वतिर सरदर स्थानभन्दा उत्तरतर्फ रहेको छ ।
“मनसुनको न्यूनचापीय रेखा पश्चिमतिर सरदर स्थानभन्दा दक्षिणतर्फ तथा पूर्वतिर सरदर स्थानभन्दा उत्तरतर्फ रहन् भनेको पश्चिमतिर कम वर्षा हुनु हो,” रोजन भन्छन्, “अबका केही दिन पश्चिमतिर कम र पूर्वी भागतिर धेरै वर्षा हुनेछ ।” न्यूनचापीय रेखा जतिधेरै माथि सर्छ त्यति धेरै नेपालमा वर्षा हुने उनको भनाइ छ ।
चारवटा प्रदेशमा भारी वर्षा, जनजीवन प्रभावित हुनसक्ने
देशका विभिन्न भू–भागमा आज पनि वर्षाको सम्भावना रहेको छ । केही प्रदेशमा भारी वर्षाको सम्भावना रहेको छ । भारी वर्षा हुने क्षेत्रमा जनजीवन प्रभावित हुने जल तथा मौसम विज्ञान विभागले जनाएको छ ।
आज कोसी, मधेस, गण्डकी र लुम्बिनी प्रदेशका एकदुई स्थानमा मेघगर्जन र चट्याङसहित भारी वर्षाको सम्भावना रहेको छ ।