तेहरान । इरानको दक्षिणी सहर शिराजस्थित एक धार्मिकस्थलमा गत वर्ष भएको गोलीकाण्डमा एक दर्जनभन्दा बढी व्यक्तिको हत्या गरेको आरोपमा शनिबार दुईजनालाई सार्वजनिक स्थानमा फाँसीको फैसला भएको इरानी एक न्यायपालिकाले जनाएको छ ।

गएको अक्टोबर २६ मा शाह चेरागको शिया मुस्लिम दरगाहमा भएको आक्रमणमा १३ जनाको मृत्यु हुनुका साथै ३० जना घाइते भएका थिए ।

“शाह चेराग आतंकवादी हमलाका दुईजना दोषीलाई आज बिहान सार्वजनिक रूपमा मृत्युदण्डको सजाय सुनाइएको छ,” न्यायपालिकाको मिजान अनलाइन वेबसाइटले जनाएको छ ।

सरकारी समाचार संस्था इरनाका अनुसार अदालतको फैसलाअनुरूप फारस प्रान्तको राजधानी शिराजस्थित दरगाहनजिकैको सडकमा उनीहरूलाई झुन्ड्याइएको छ । मिजानका अनुसार फाँसी दिइएकाहरू मोहम्मद रमेज रशिदी र नइम हाशेम कताली रहेका छन् ।

इरानले यसअघि उक्त आक्रमणमा छिमेकी अफगानिस्तानलगायत अरू मुलुकका नागरिक संलग्न रहेको जनाएको थियो । तर, मृत्युदण्ड दिइएका व्यक्तिको राष्ट्रियता सार्वजनिक गरिएको छैन ।

अफगानिस्तान र पाकिस्तानसँग सीमा जोडिएको इरानको उक्त क्षेत्र अशान्तिको केन्द्र बनेको र शनिबार चार आक्रमणकारीले सुन्नी बाहुल्य रहेको सहर जाहेदानमा दुई इरानी प्रहरीको हत्या गरेको सरकारी सञ्चारमाध्यमले जनाएको छ । रासस/सिन्ह्वा