काठमाडौं । अर्जेन्टिनी फरवार्ड एन्जल डी मारिया दोस्रोपटक बेन्फिकामा अनुबन्धित भएका छन् ।

बेन्फिकाले बिहीबार सामाजिक सञ्जालमार्फत डी मारियासँग सम्झौता गरेको खुलाएको हो । डी मारियाले यसअघि सन् २००७ देखि २०१० सम्म बेन्फिकाबाट खेलेका थिए । डी मारिया बेन्फिकाबाट नै युरोपियन फुटबलमा भित्रिएका हुन् ।

उनले गत सिजन इटालियन क्लब युभेन्ट्समा बिताएका थिए । युभेन्ट्स आउनुअघि डी मारियाले सात वर्ष फ्रेन्च क्लब पेरिस सेन्ट जर्मन (पीएसजी)का लागि खेलेका थिए ।

“घरमा स्वागत छ, डी मारिया,” सामाजिक सञ्जालमा सार्वजनिक भिडियोमा बेन्फिकाले लेखेको छ । क्लबले हालसम्म सम्झौताको बारेमा केही नखुलाए पनि अन्तर्राष्ट्रिय सञ्चारमाध्यमले भने एक वर्षका लागि डी मारिया पोर्चुगिज क्लबमा गएको जनाएका छन् ।

डी मारियाले बेन्फिकामा अर्जेन्टिनाका सहकर्मी निकोलस ओटामेन्डीसँग खेल्नेछन् । अर्जेन्टिनाले गत वर्ष कतारमा सम्पन्न फिफा विश्वकपको उपाधि जित्दा ओटामेन्डी र डी मारिया टिमका महत्वपूर्ण सदस्य थिए ।