काठमाडौं । उपप्रधान तथा गृहमन्त्री नारायणकाजी श्रेष्ठले मिटरब्याज पीडितलाई न्याय नदिलाइ विश्राम नलिने बताएका छन् । पीडितलाई हरहालतमा न्याय दिलाउने सामाजिक सञ्जालमार्फत उनले बताए ।

संसद्बाट मिटरब्याजसम्बन्धी विधेयका पारित हुन नसके पनि पीडितलाई न्याय दिलाउने काम नरोकिने उनले बताएका हुन् ।

“आज म धेरै आहात भएको छु । आज प्रतिनिधिसभाबाट मिटरब्याजसम्बन्धी विधेयक पारित हुनुपर्थ्यो । तर गरिएन,” उनले लेखेका छन्, “आजैदेखि यस सम्बन्धमा जारी गरिएको अध्यादेश निष्कृय भएको छ । यसबाट को पीडित जनताको पक्षमा छ र को विपक्षमा छ भन्ने स्पष्ट भएको छ ।”

उनले सामन्ती शोषणको यो अवशेषलाई हरहालतमा अन्त्य गरिने बताए । उनले लेखेका छन्, “पीडितलाई न्याय दिने यो अभियानलाई असफल पारियो भनेर पीडक वा तिनका पक्षधरहरुले सोचेका छन् भने त्यो ठूलो भ्रम हो । पीडितलाई न्याय नदिलाई विश्राम लिइने छैन ।”

गृहमन्त्री श्रेष्ठले आयोगले काम जारी राख्ने पनि बताए । प्रजिअ कार्यालयमा सहजीकरण समितिको काम निरन्तर अघि बढ्ने पनि उनले जानकारी दिए ।

“विधेयक संसद्को प्रकृयामा छ, अघि बढाइनेछ र कानुन बनाइ छाडिनेछ,” उनले लेखेका छन्, “तसर्थ, पीडितहरुलाई निरास नहुन र सकृयताका साथ यो मुक्ति अभियानमा निरन्तर लागिरहन अपिल गर्दछु । न्याय र विजय सुनिश्चित छ ।”