काठमाडौं । रौतहटका विभिन्न स्थानहरूबाट विद्युतीय ट्रान्सफर्म चोरी गरेको आरोपमा चारजना पक्राउ परेका छन् ।

पक्राउ पर्नेहरूमा गरुडा नगरपालिका–६, पोठीयाही बस्ने ४२ वर्षीय अशोक साह, कटहिया नगरपालिका–१, भसेढवा बस्ने ४६ वर्षीय रामलाल महतो, सोही ठाउँ बस्ने ३६ वर्षीय वीरेन्द्र राय र ३७ वर्षीय सुखल महतो रहेका छन् ।

उनीहरूलाई आइतबार प्रहरीले पक्राउ गरेको हो । रौतहटका विभिन्न स्थानहरूका ट्रान्सफर्मबाट तार लगायतका सामान चोरी गरेको घटना अनुसन्धानको क्रममा उनीहरूलाई पक्राउ गरेको हो ।

प्रहरीले गरुडा नगरपालिका–४ स्थित कवारबाट तामाको चुडी १७५ किलो ७०० ग्राम, तामाको क्वाईल १२९ किलो ३०० ग्राम, खुल्ला तामाको तार ७१ किलोग्राम बरामद गरेको छ ।

साथै उनीहरूबाट मोटरसाइकल दुई थान, स्कुटर एक थान र मोबाइल चार थान समेत प्रहरीले बरामद गरेको छ ।

उनीहरू उपर जिल्ला अदालत रौतहटबाट चोरीसम्बन्धी कसुरमा म्याद थप गरी आवश्यक अनुसन्धान भइरहेको प्रहरीले जनाएको छ । घटनामा संलग्न हाल फरार अन्य व्यक्तिहरूको प्रहरीले खोजी गरिरहेको छ ।