काठमाडौं । माल्टा पठाइदिन्छु भन्दै रकम ठगी गरेको आरोपमा एकजना पक्राउ परेका छन् । 

पक्राउ पर्नेमा झापाको अर्जुनधारा नगरपालिका–३, मदनपुर घर भई काठमाडौंको टोखा नगरपालिका–३, धापासी बस्ने ३८ वर्षीय युवराज लिम्बू रहेका छन् । उनलाई बिहीबार दिउँसो प्रहरीले पक्राउ गरेको हो । 

लिम्बुले एक व्यक्तिलाई वैदेशिक रोजगारका लागि माल्टा पठाई मासिक एक लाख रुपैयाँभन्दा बढी तलबमा काम लगाइदिन्छु भन्दै प्रलोभनमा पारी पीडितबाट पटकपटक गरी ६ लाख ३० हजार रूपैयाँ दिई सम्पर्कविहीन भएका थिए । 

उनलाई पक्राउ गरी उपस्थित गराउन वैदेशिक रोजगार विभागबाट पत्राचार भएपछि काठमाडौं उपत्यका अपराध अनुसन्धान कार्यालय मीनभवनबाट खटिएको प्रहरी टोलीले काठमाडौं महानगरपालिका–५, कालोपुलबाट पक्राउ गरेको जनाइएको छ ।