काठमाडौं । लामो समयको प्रतिक्षापछि मंगलबार क्रिकेटको सर्वोच्च निकाय अन्तर्राष्ट्रिय क्रिकेट काउन्सिल (आईसीसी) ले भारतमा हुने एकदिवसीय विश्वकपको तालिका सार्वजनिक गर्‍यो ।

तालिकाअनुसार भारतले आफ्नो चिर–प्रतिद्वन्दी पाकिस्तानविरुद्ध अक्टोबर १५ मा अहमदाबादस्थित नरेन्द्र मोदी रंगशालामा खेल्नेछ । तर, तालिका सार्वजनिक भइसक्दा पनि पाकिस्तानले विश्वकपका लागि भारत भ्रमण गर्नेछ भन्ने निश्चित भइसकेको छैन ।

आईसीसीले सहभागी राष्ट्रहरूलाई प्रतियोगिताको ड्राफ्ट तालिका वितरण गरेको दुई हप्तापछि विश्वकपको खेल तालिका सार्वजनिक गरेको हो । यद्यपि, पाकिस्तानी क्रिकेट बोर्ड (पीसीबी)ले तालिका आएपछि पनि भारत भ्रमणका लागि सरकारको अनुमति आवश्यक रहेको बताएको छ ।

“भारत भ्रमणका लागि पीसीबीलाई पाकिस्तान सरकारको अनुमति आवश्यक पर्छ,” पीसीबीका सञ्चार निर्देशक सामी उल हसनले भने, “हामी दिशानिर्देशका लागि सरकारसँग छलफल गरिरहेका छौँ । अहिलेको स्थिति केही हप्ताअघि आईसीसीले हामीसँग तालिकाको ड्राफ्ट सेड्युल बाँड्दाको जस्तै अनिश्चित छ । त्यसबेला पनि उनीहरूले हाम्रो प्रतिक्रिया खोजेका थिए ।”

तालिकाअनुसार पाकिस्तानले अक्टोबर ८ मा जिम्बाब्वेमा जारी विश्वकप छनोटबाट आउने प्रतियोगिताको विजेतासँग खेल्दै विश्वकपको यात्रा सुरु गर्नेछ । त्यसपछि पाकिस्तानले दोस्रो खेलमा पनि विश्वकप छनोटबाट आएको दोस्रो टिमसँग खेल्नेछ । यसपछि पाकिस्तानले अहमदाबादस्थित विश्वकै सबैभन्दा ठूलो क्रिकेट रंगशाला (एक लाख ३२ हजार दर्शक क्षमताको)मा भारतविरुद्ध विश्वकपकै बहुप्रतिक्षित खेल खेल्नेछ ।

मैदानको विषयमा चिन्ता ?
पाकिस्तानले यसअघि भारतसँगको खेलका लागि हिन्दु राष्ट्रियता बोकेका प्रधानमन्त्री नरेन्द्र मोदीको नाममा रहेको अहमदाबादको रंगशालाको विषयमा चासो व्यक्त गरेको थियो । अहमदाबाद त्यही सहर हो, जहाँ सन् २००२ मा भएको साम्प्रदायिक हिंसामा परी करिब एक हजार जना मानिसहरूको मृत्यु भएको थियो । जसमध्ये अधिकांश मुस्लिम थिए ।

अहमदाबादपछि पाकिस्तानले अक्टोबर २० मा हुने अस्ट्रेलियाविरुद्धको खेलका लागि बेंगलुरुको यात्रा गर्नेछ । पाकिस्तानले अक्टोबर २३ मा अफगानिस्तानविरुद्ध र अक्टोबर २७ मा दक्षिण अफ्रिकाविरुद्धको खेलका लागि चेन्नाईको यात्रा गर्नेछ ।

यसपछि पाकिस्तान अक्टोबर ३१ मा बंगलादेशसँग खेल्न कोलकाता पुग्नेछ । र, नोभेम्बर ४ मा न्युजिल्यान्डविरुद्ध खेल्न पुनः बेंगलुरु फर्किदा इंग्ल्यान्डसँगको खेलका लागि नोभेम्बर १२ मा कोलकाता पुग्नेछ ।

पीसीबीले मुम्बईमा खेल्ने कुरामा चिन्ता व्यक्त गरेको थियो । र, आईसीसीले पनि पाकिस्तानको चिन्तालाई सम्बोधन गर्दै पाकिस्तानको खेल मुम्बईमा राखेको छैन । यदि बाबर आजमको टिम सेमिफाइनलमा प्रवेश गरे पाकिस्तानको खेल कोलकातामा हुनेछ । र, भारत सेमिफाइनलमा प्रवेश गरे भारत र पाकिस्तान भिड्ने समीकरण नबने यो खेल मुम्बईमा हुनेछ ।

एसिया कपलाई लिएर पाकिस्तान र भारतबीच खिचातानी रहेका कारण विश्वकपको तालिका प्रतियोगिता सुरु हुन चार महिनाभन्दा कम समय बाँकी रहँदा घोषणा भएको हो । यही अगस्टदेखि सेप्टेम्बरमा हुने तालिका रहेको एसिया कपका लागि भारतले पाकिस्तानको यात्रा गर्न अस्वीकार गरेको थियो । यसको प्रतिक्रियामा पाकिस्तानले पनि भारत एसिया कपका लागि आफ्नो मुलुक नआए विश्वकप ‘बाइकट’ गर्ने धम्की दिएको थियो ।

तर, पाकिस्तान प्रतियोगिताको आयोजना अधिकार श्रीलंकासँग बाड्न तयार भएपछि यी दुईबीचको तनावले निकासा पाएको थियो ।

मैदान परिवर्तनको सम्भावना ?
हाल पाकिस्तानी क्रिकेट बोर्ड नयाँ अध्यक्ष पाउने संघारमा छ । पीसीबी व्यवस्थापन समितिका अन्तरिम प्रमुख नजम सेठीले गत साता राजीनामा दिएपछि प्रधानमन्त्रीको मनोनयनमा परेका जाका अशरफलाई पाकिस्तानको क्रिकेट प्रमुख बन्ने बाटो खुलेको छ ।

पीसीबीको निर्वाचनलाई पाकिस्तानको अदालतले रोकेको छ । तर, अशरफले आफ्नो पूर्ववर्तीले सहमति गरेको हाइब्रिड मोडललाई सम्मान गर्ने बताउँदै उपयुक्त परामर्शपछि विश्वकपमा टोली पठाउने निर्णय हुने संकेत दिएका छन् ।

पीसीबीले पनि विश्वकप तालिकाको सूची सरकारका सम्बन्धित विभागहरूलाई पठाएको छ । र, क्रिकेट नेतृत्व सरकारको निर्णय अझै पर्खिएको छ । विशेषगरी सुरक्षासम्बन्धी गम्भीर मुद्दा भएमा पाकिस्तानको खेलहरू हुने तय भएका आधिकारिक विश्वकप तालिका परिवर्तन हुने सम्भावना धेरै छ ।

“यदि त्यसो भयो भने, यो अभूतपूर्व हुनेछैन,” पीसीबीका सञ्चार निर्देशक सामी उल हसनलाई उदृत गर्दै पाकिस्तानी सञ्चार संस्था डनले लेखेको छ । यसअघि पनि भारतमा हुने विश्वकपको तालिका सार्वजनिक भइसकेपछि भारत–पाकिस्तानको खेल स्थान परिवर्तन नभएको भने होइन ।

आईसीसीबाट आधिकारिक तालिका घोषणा भएपछि सन् २०१६ को विश्वकपमा बहुप्रतिक्षित भारत–पाकिस्तान भिडन्त धर्मशालाबाट कोलकातामा स्थान परिवर्तन गरिएको थियो ।

“तर, पीसीबीले विश्वकपका लागि सरकारसमक्ष दुई कुरामा अनुमतिका लागि निवेदन गरेको छ । पहिलो विश्वकपका लागि भारतको यात्रा र दोस्रो केही निश्चित मैदानमा खेल्ने अनुमति,” हसनले भने ।

विश्वकपमा सहभागिताबारे प्रतिक्रियाका लागि सम्पर्क गर्दा पाकिस्तानी परराष्ट्र कार्यालयले गत हप्ता प्रस्तुत गरेको कुरालाई दोहोर्‍यायो । सरकारले पाकिस्तानी क्रिकेटरहरूको सुरक्षा अवस्थालगायत विश्वकपमा सहभागितासम्बन्धी ‘सबै पक्षहरूलाई अवलोकन र मूल्यांकन गरिरहेको’ र ‘हामी हाम्रो विचार पीसीबीलाई समयमै प्रस्तुत गर्नेछौँ’, डनले पाकिस्तानको परराष्ट्र कार्यलयलाई उदृत सरकारी संयन्त्रबाट आएको प्रतिक्रियालाई लेखेको छ । पाकिस्तानी सञ्चार सञ्चार संस्था डनको सहयोगमा