काठमाडौं । सत्तासाझेदार दल नेपाली कांग्रेसका सांसद प्रतिमा गौतमले हिन्दु धर्मावलम्बीको आस्थाको केन्द्र पशुपतिनाथलाई जथाभावी विवादमा ल्याइएको बताइएकी छन् । जलहरी प्रकरणले सारा हिन्दुको भावनामा चोट पुग्ने काम गरिएको भन्दै उनले आपत्ति जनाइन् ।
मंगलबार प्रतिनिधिसभा बैठकमा उनले धर्मको नाममा भइरहेको नौटंकी बन्द गर्न र पशुपतिनाथ मन्दिरमा चढाइएको जलहरीको सबै सुन राज्यकोषमा दाखिला गर्न माग गरिन् । पशुपतिनाथको मौलिक स्वरूप देखिने गरी पुरानै अवस्थामा राख्नुपर्नेमा उनले जोड दिइन् ।
अख्तियार दुरुपयोग अनुसन्धान आयोगले ढिलै भए पनि सो जलहरीको नापतौल र गुणस्तर परीक्षण गर्नु राम्रो भएको उनले उल्लेख गरिन् । जलहरीमा व्यक्तिको नाम कुँदिने कार्य भर्त्सनायोग्य भएको उनको भनाइ छ ।
“भांग्रा ओढी बाघको छालामा बस्ने भोलेबाबाले मलाई सुनको जलहरी चढाऊ भनेका थिए, न त भोलेनाथलाई सुनको जलहरी चढाउँदा शिवलिंगको मौलिक स्वरूप नै दर्शन गर्न पाइने हो,” उनले भनिन्, “अराध्यादेव पशुपतिनाथलाई समेत जथाभावी विवादमा ल्याइदिएर सारा हिन्दुहरूको भावनामा चोट पुग्ने काम गर्दिए । गर्भगृहमा रहेको शिवलिंगलाई छुन त हुँदैन भन्ने मान्यता छ । धर्मको नामको नौटंकी बन्द गराई चढाएको सबै सुन राज्यकोषमा दाखिला गरी पशुपतिनाथको मौलिक स्वरूप देखिने गरी पुरानै अवस्थामा राखियोस् ।”
उनले मन्दिरभित्र दानपेटिका चोरी भएको, घ्याम्पो हराएको र विभिन्न नाममा भएको अनधिकृत कार्यको सत्यतथ्य जानकारी गराउन माग समेत गरिन् ।
