काठमाडौं । नेपाली कथानक चलचित्र ‘परस्त्री’लाई चलचित्र सेन्सर बोर्ड (केन्द्रीय चलचित्र जाँच समिति)ले रिलिजका लागि सेन्सर पासको सर्टिफिकेट दिन अस्वीकार गरेको छ । चलचित्रमा रहेका केही सिन नहटाउँदासम्म रिलिजका लागि अनुमति दिन नसकिने सेन्सर बोर्डले जनाएको निर्माण पक्षले पुष्टि गरेको छ ।
आज (मंगलबार) साँझ सेन्सरका लागि सेन्सर बोर्डले चलचित्र हेरेको थियो । चलचित्र हेरेपछि सेन्सर बोर्डले रिलिजका लागि सेन्सर पासको सर्टिफिकेट नदिएको हो ।
“चलचित्रमा भ्वाइलेन्सका दृश्य रहेको भन्दै सेन्सरले हटाउन भनेको छ । चलचित्रमा भ्वाइलेन्सका सिन, चुम्बनका सिन, बेड सिन र रगतका सिनेमा सेन्सरले आपत्ति जनाएको छ,” परस्त्री निर्देशक सुरज पाण्डेले बाह्रखरीसँग भने, “केही दृश्य हटाउन वा ब्लर गर्न भनेको छ । रगतको सिनमा ब्ल्याक एन्ड ह्वाइट गर्न भनेको छ ।”
निर्देशक सुरजले अब एडल्ट सर्टिफिकेटका लागि सेन्सर बोर्डसँग आग्रह गर्ने बताए । एडल्ट सर्टिफिकेट पनि दिन नमाने त्यसको विकल्पमा कस्तो कदम चाल्ने त्यसपछि निर्णय गर्ने उनको भनाइ छ । यस विषयमा पनि छलफल भइरहेको उनको भनाइ छ ।
जब जुन विषयमा समाजले खुलेर कुरा पनि गर्दैन, त्यसैमा अफर आयो
सुरज पाण्डेको डेब्यु निर्देशन ‘परस्त्री’मा शिल्पा मास्के कोसिस क्षेत्री, गौरव विष्ट मुख्य भूमिकामा छन् ।
दीपेन्द्र के खनालले लेखेको चलचित्रकी निर्मात्री शर्मिला पाण्डे हुन् ।
असार १५ गते नेपाल र भारतमा चलचित्र एक साथ रिलिज हुँदै छ । हिन्दी र नेपाली भाषामा बनेको चलचित्र भारतमा पनि रिलिज हुने निर्माण पक्षले जनाएको छ ।
