काठमाडौं । जुन विषयमा समाज र परिवारमा खुलेर छलफल पनि हुँदैन, त्यही विषयको सिनेमाका लागि शिल्पा (मास्के)लाई अफर आयो । अर्थात् विवाहेत्तर सम्बन्धको सिनेमाका लिड रोलका लागि । सुरुमा त कसरी गर्ने उनी आफैँले आफैँलाई कन्भिन्स गर्न गाह्रो भयो । 

आजसम्म उनको विवाह पनि भएको छैन । विवाहेत्तर सम्बन्धको कुरा त पछिको कुरा । “कुनै एउटा गाउँले केटीको रोल भएको भए म कुनै गाउँमा गएर बस्थेँ होला । त्यहाँको भाषा र लवजका बारेमा अध्ययन गर्थें होला अथवा कसैको यसो गर भनेर दिएको इन्स्ट्रक्सन अनुसार काम गर्थें होला,” शिल्पाले चलचित्र ‘परस्त्री’ सिनेमामा आफ्नो क्यारेक्टरको अफरको क्षण सुनाउँछिन्, “तर, यो क्यारेक्टर त मेरै लागि चुनौतीपूर्ण थियो । त्यसैले सुरुमा के गर्ने होला भनेर आफैँले आफैँलाई कन्भिन्स गर्न कठिन भइरहेको थियो ।” 

शिल्पालाई कहाँबाट ल्याउने यसको रिफरेन्स, कसरी यसबारे जान्ने, कसरी खिचिन्छ होला ? भन्ने जस्ता धेरै प्रश्नले एकैपटक घेरे । तर, उनले जब सिनेमाको टिम सम्झिइन् अनि उनी आफैँले आफैँलाई कन्भिन्स् गरिन्– म सँग राम्रो टिम छ, किन सक्तिन काम गर्न ? सक्छु । रिल लाइफ पो हो त, रियल लाइफ त होइन नि !  

‘मेरो पेसा नै अभिनय हो, मैले फरक–फरक रोल गर्नुपर्छ । यसरी फरक रोलमा अफर आउनु र काम गर्न पाउनु त राम्रो हो नि !’ उनले आफैँले आफैँलाई कन्भिन्स गरिन् । 

शिल्पालाई अर्को कुराको पनि लोभ थियो, र त्यो हो सुरज पाण्डेको निर्देशन । सुरजको यो पहिलो सिनेमा थियो । हरेक निर्देशकले आफ्नो पहिलो सिनेमामा सतप्रतिशत मिहिनेत गर्छ भन्ने उनलाई थाहा थियो । “निर्देशकका लागि पहिलो सिनेमा उसको बच्चाजस्तै प्यारो हुन्छ भन्ने मलाई थाहा थियो”, शिल्पा भन्छिन्, “सुरजको पहिलो निर्देशन भएकाले मलाई उसले राम्रो काम गर्छ भन्ने विश्वास थियो । दीपेन्द्र के खनाल दाइको लेखन थियो । उहाँका सिनेमाको पेस मलाइ मन पर्छ । त्यसैले मैले भनेको हो यो टिमप्रति मलाई विश्वास छ ।” त्यसैले त उनी स्पष्ट भन्छिन्– मलाई म सँग भन्दा पनि मेरो टिमप्रति विश्वास छ ।

सुरज पाण्डेको निर्देशन रहेको चलचित्रमा शिल्पा मास्के मुख्य भूमिकामा छिन् । कोसिस क्षेत्री र गौरव विष्ट पनि चलचित्रको मुख्य भूमिकामा छन् । 

यही असार १५ गतेबाट सिनेमा नेपाल र भारतमा एक साथ रिलिज हुँदै छ । हिन्दी भाषामा पनि चलचित्र रिलिज हुनेछ ।