काठमाडौं । नेपाली कांग्रेसका सांसद एवं पूर्वअर्थमन्त्री ज्ञानेन्द्रबहादुर कार्कीले सुनसरीस्थित भोक्राहा नरसिंह गाउँपालिकालाई ‘विशेष आर्थिक क्षेत्र’ घोषणा गर्न सरकारसँग माग गरेका छन् ।

मंगलबार प्रतिनिधिसभा बैठकको शून्य समयमा उनले सो क्षेत्रमा आवश्यक पूर्वाधार विकास भइसकेकाले विशेष आर्थिक क्षेत्र घोषणा गर्न सरकारले ढिलाइ गर्न नहुनेमा जोड दिए ।

सांसद कार्कीले पूर्वी पहाडी जिल्लाहरूमा बाढी र पहिरोमा परी धेरै जनधनको क्षति भएको उल्लेख गरे । पीडितलाई उचित राहत, उद्धार र पुनर्वासको आवश्यक व्यवस्था मिलाउन पनि उनले सरकारको ध्यानाकर्षण गराए ।

“सुनसरी जिल्ला अवस्थित भोक्राहा नरसिंह गाउँपालिका विशेष आर्थिक क्षेत्रको रूपमा विकसित गर्नका निमित्त, यहाँ पूर्वाधारको व्यवस्था छ । तसर्थ, उक्त गाउँपालिकालाई विशेष आर्थिक क्षेत्रको रूपमा परिणत गर्न समामुखमार्फत माननीय अर्थमन्त्रीज्यूको ध्यानाषर्कण गराउन चाहन्छु,” उनले भने, “गत शनिबार संखुवासभा, तेह्रथुम, ताप्लेजुङमा जुन भीषण वर्षा भयो, त्यसबाट त्यहाँ धेरै जन र धनको क्षति भएको छ । त्यो क्षतिलाई राहत, उद्धार र पुनस्र्थापना गर्दै त्यहाँको जनजीवनलाई सहज बनाउन सरकारको विशेष ध्यान जाओस् भन्ने पनि म कामना गर्दछु ।”

बाढीपहिरोपीडितलाई सहज हुने गरी खाद्यान्नलगायत अति आवश्यक वस्तुको व्यवस्था मिलाउन पनि सरकारले ध्यान दिनुपर्ने उनले बताए ।