काठमाडौं । राष्ट्रिय स्वतन्त्र पार्टी (रास्वपा)का सांसद हरि ढकालले संघीय संसद् भवनभित्रै भएको बेथितिबाट आफूलाई लज्जाबोध भएको बताएका छन् ।

मंगलबार प्रतिनिधिसभा बैठकको शून्य समयमा उनले संसद् सचिवालयका कर्मचारीलाई खाजाभत्ता समेत हुने उल्लेख गरे । तर, १२ घण्टा काममा खटिने मर्यादापालकलाई एक पैसा पनि भत्ता नहुने विभेदले आफूलाई लज्जाबोध गराएको उनले बताए ।

संसद् भवनको छानो टाल्नका लागि आएको पैसा र डिप बोरिङका लागि निकासा भएको रकम खर्च नभएकाले त्यसको छानबिन गर्न सरकार र सम्बन्धित निकायसँग उनले माग गरे ।

“बेथितिका कुराहरू गरिरहँदा मित्रराष्ट्र चीन सरकारले बनाइदिएको यो बिल्डिङ सहरी विकास मन्त्रालयअन्तर्गत पर्दछ । यो बिल्डिङको बेथितिको कुरा उठाउँदै छु । सहरी विकास मन्त्रालयमा छानो टाल्नलाई बजेट आउँदो रहेछ । यो वर्ष पनि चुहिन्छ । यही कम्पाउन्डभित्र पानीको समस्या समाधान गर्न डिप बोरिङ खोलिएको रहेछ । पानी आउँदैन, भुक्तानी भएछ,” उनले भने, “यहीभित्र संसद् सचिवालयका कर्मचारीहरूको खाजाभत्ता छ । मर्यादापालक दाजुभाइ, दिदीबहिनीहरूको १२ घण्टासम्म यहाँ डिउटी गर्नुहुन्छ, उहाँहरूलाई एक रुपैयाँ पनि भत्ता छैन । यो विभेद, यहीभित्र भएको विभेद, बेथिति, आँखाअगाडिको यो बेथिति हेरिरहँदाचाहिँ लज्जाबोध हुन्छ । म सरकार र सम्बन्धित पक्षको गम्भीर ध्यानाकर्षण गराउन चाहन्छु ।”