विराटनगर । कोसी प्रदेश सरकार र पहिचानवादीबीच सोमबार प्रदेश राजधानी विराटनगरमा वार्ता भएको छ । कोसी प्रदेश नामकरण खारेजीको माग गर्दै आएको प्रदेश नम्बर–१ पुनः नामांकन समिति र प्रदेश सरकारको टोलीबीच विराटनगरस्थित बिग होटेलमा छलफल भएको हो ।

पहिलो वार्तामा आन्दोलनरत पक्षका मागबारे छलफल गरिएको थियो । सरकारी वार्ता टोलीका संयोजक एवं कोसी सरकारका खानेपानी, सिँचाइ तथा ऊर्जामन्त्री तिलकुमार मेन्याङबोले फेरि छलफल गर्ने सहमति गरिएको जानकारी दिए ।

उनले भने, “विषय र माग उठान भएका छन् । फेरि घनीभूत छलफल गर्ने गरी पुनः वार्तामा बस्छौँ ।”

आन्दोलनरत पक्षका वार्ता टोली सदस्य रामभक्त कुरुङवाले सरकारसँग औपचारिक रूपमा छलफल सुरु हुनु सकारात्मक भएको बताए । “हामीले उठाएको मागका विषयमा वार्ताको माध्यमबाट औपचारिक ढंगले राख्ने काम भएको छ । फेरि यसलाई निरन्तरता दिइनेछ,” उनले भने ।

गएको फागुन १७ गते प्रदेशसभाबाट कोसी प्रदेश नाम पारित गरिएसँगै पहिचानवादी दल तथा संगठनले मोर्चा बनाएर सरकारविरुद्ध आन्दोलन गरिरहेका छन् । प्रदेश राजधानीकेन्द्रित आन्दोलन गरिँदा झडपका क्रममा एक प्रदर्शनकारीको मृत्यु समेत भएको थियो ।

संघर्ष बढ्दै जाँदा आन्दोलनरत पक्षले कोसी प्रदेश लेखिएका बोर्ड हटाउनेदेखि प्रदेशसभा सदस्यलाई जिल्ला प्रवेशमा समेत अवरोध गर्दै आएको छ । सरकारले आन्दोलनरत पक्षलाई औपचारिक रूपमै पत्राचार गरेपछि वार्ता भएको हो ।

मन्त्री मेन्याङबोले भने, “यो छलफलको प्रारम्भ हो । अब अझ गहन रूपमा अघि बढ्छौँ ।”

उनले दुवै पक्षबीच सहमति गरी वार्ताको अर्को मिति तय गरिने जानकारी दिए ।

कोसी प्रदेशको नाम पहिचानका आधारमा राख्न यसको पुनः नामांकन गरिनुपर्ने पहिचानवादीले माग गर्दै आएका छन् ।