काठमाडौं । प्रतिबन्धित अनलाइन बेटिङ एप वानएक्सबेट मा सट्टेबाजी र त्यसको विज्ञापन गरेको भन्दै काठमाडौं उपत्यका अपराध अनुसन्धान कार्यालयले चर्चित कलाकार बल्छी धुर्वे (मरिचमान श्रेष्ठ)सहित आठजना पक्राउ परेपछि वानएक्सबेट अहिले चर्चाको विषय बनेको छ ।

प्रहरीले पक्राउ गरेका आठैजना नेपालका चर्चित कलाकार तथा ‘सोसल इन्फ्लुयन्सर’ पर्छन् । श्रेष्ठसँगै पक्राउ पर्नेमा पवन खतिवडा (म्याकुरी), राजु पौडेल (राजु मास्टर), एलिस राई, जलन घर्तीमगर, गणेश देवकोटा (जीडी) सरोज घिमिरे (ढेडु बुढो) र बेगम नेपाली (भटभटे माइला) छन् ।

• बल्छी ध्रुवे, राजु मास्टर र म्याकुरीसहित पाँच यूट्युवर पक्राउ

वानएक्सबेटको विज्ञापन र प्रचार गरेको आरोपमा श्रेष्ठ पक्राउ परेको कुराले नेपालीका अधिकांश चर्चित युट्युब च्यानलका सञ्चालक तथा प्रयोगकर्ताहरुमाझ खैलाबैला मच्चिएको छ ।

नेपालका सबैजसो युट्युब च्यानलका सञ्चालक आफ्ना हरेक भिडियोमा डिस्क्रिप्सनमा दिएको लिंकमा गएर ‘यो प्रोमो कोड प्रयोग गरी यति प्रतिशतसम्म बोनस पाउनुहोस्’ भन्दै अनलाइन जुवालाई प्रोत्साहन गरिरहेका हुन्छन् ।

अनलाइन जुवाका लागि युट्युबर किन प्रोत्साहन गर्छन् ?

नेपालमा सबैखाले जुवा र सट्टेबाजी प्रतिबन्धित विषयमा पर्छन् । यस्तो खेल खेल्न खेलाउन र प्रोत्साहन गर्न कानुनी रुपमा बन्देज लगाइएको छ । नेपाल सरकारले मंसिर १३ गते अनलाइन सट्टेबाजी गराउने सबैखाले एपलाई नेपालमा प्रतिबन्ध लगाएको थियो ।

वानएक्सबेट सन् २००७ मा स्थापना भएको अनलाइन जुवा खेलाउने कम्पनी हो । त्यसबेला यसले साइप्रसलाई आधार बनाएर कार्य सुरु गरेको थियो । त्यसयता यसले आफ्नो अनलाइन जुवाको धन्दालाई विश्वव्यापी बनाउँदै लगेको छ ।

युट्युबमा आउने भिडियोको आर्थिक स्रोत भ्युजको आधारमा युट्युबले दिने पैसा हो । यसबाहेक, च्यानल चर्चित रहे अन्य विभिन्न विज्ञापनबाट पैसा आउँछ । यही विज्ञापनमध्येकै एक विज्ञापनमा पर्छ वानएक्सबेटको प्रचार । अर्थात अनलाइन जुवा खेल्न प्रोत्साहित गर्ने गरेवापत ती युट्युब च्यानलका सञ्चालकले वानएक्सबेटबाट मोटो रकम पाउँछन् ।

कोही व्यक्ति कुनै युट्युबरले दिएको प्रोमो कोडको प्रयोग गरेर वानएक्सबेटमा साइन अप गरेर अनलाइन बेट लगाउँछ र त्यहाँ हार्छ भने उक्त युट्युबरलाई कम्पनीले २५ देखि ३० प्रतिशत कमिसन दिने रिपोर्टहरु बाहिरिएका छन् । जसकारण युट्युबरमाझ अनलाइन जुवालाई प्रोत्साहन गर्ने कुरा निकै चर्चित छ ।