काठमाडौं । भाडा नतिरेपछि सामाजिक सञ्जाल कम्पनी ट्विटरलाई अमेरिकाको कोलोराडोस्थित कार्यालयबाट निष्कासन गरिने भएको छ । एलन मस्कले खरिद गरेयता विभिन्न उतारचढाव झेलिरहेको कम्पनीले व्यहोरेको यो पछिल्लो झड्का हो ।
कोलोराडोको बोल्डर जिल्ला अदालतका न्यायाधीशले गएको मे ३१ मा ट्विटरलाई त्यहाँको कार्यालयबाट निष्कासन गर्न ४९ दिनको समय दिएका थिए ।
६५ हजार वर्गफुटको कार्यालयमा कुनै समय ३०० कर्मचारीले काम गर्थे । गएको अक्टोबरमा मस्कले कम्पनी किनेयता त्यहाँ करिब १५० कर्मचारी रहेको अनुमान गरिएको छ ।
ट्विटरका घरधनीले मे १२ मा कम्पनीविरुद्ध भाडा नतिरेको उजुरी हालेका थिए । ट्विटरले सन् २०२० फेब्रुअरीदेखि उक्त स्थान कार्यालय भाडाका लागि लिएको बताइएको छ ।
गएको महिना बोल्डरकै हिमस्खलन कमर्सियल क्लिनिङ कम्पनीले पनि ट्विटरले ९३ हजार ५०० डलर भुक्तानी नगरेको भन्दै मुद्दा हालेको थियो । ट्विटरको मुख्यालय भने क्यालिफोर्नियाको सान फ्रान्सिस्को सहरमा छ ।
