काठमाडौं । नेपाली कथानक चलचित्र ‘परस्त्री’को हिन्दी डब ट्रेलर सार्वजनिक गरिएको छ । दुई मिनेट ४७ सेकेन्ड लामो ट्रेलरमा विवाहेत्तर सम्बन्धले निम्त्याउने पारिवारिक र सामाजिक संकट दर्शाइएको छ ।

आउँदो असार १५ गतेदेखि प्रदर्शनको तयारी गरिएको ‘परस्त्री’को हिन्दी डब ट्रेलर शनिबार सार्वजनिक गरिएको हो । सिनेमा नेपालीसँगै हिन्दी भाषामा भारतका हलमा समेत प्रदर्शन गरिनेछ ।

चलचित्रको यही जेठ २५ गते सार्वजनिक नेपाली ट्रेलरले राम्रो प्रतिक्रिया पाएको छ ।

‘परस्त्री’ सुरज पाण्डेको निर्देशनमा तयार भएको हो । दीपेन्द्र के खनालको लेखन रहेको सिनेमामा कोसिस क्षेत्री, शिल्पा मास्के, गौरव बिष्ट, एलिसा क्षेत्री, अशान्त शर्मा, गीत विष्ट, रामबाबु रेग्मी, सरस्वती अधिकारी, अर्पित न्यौपानेलगायत कलाकारको अभिनय छ ।

चलचित्रमा निरज कँडेलको छायांकन र दीर्घ खड्काको सम्पादन छ । डीएस डिजिटको ब्यानरमा निर्मित सिनेमाको भारत रिलिजमा नेन्दी क्रियसनले सहयोग गर्दै छ ।