काठमाडौं । एक सय रुपैयाँभन्दा बढीको सामान भारतबाट स्थल मार्ग हुँदै ल्याउनेले अनिवार्य भन्सार जाँचपास गर्नुपर्ने भएको छ । 

भैरहवा भन्सार कार्यालयले सूचना जारी गर्दै एक सय रुपैयाँभन्दा बढीको सामान ल्याएमा अनिवार्य भन्सार कार्यालयको यात्रु शाखामा आएर अनिवार्य जाँचपास गर्नुपर्ने व्यवस्था गरेको छ ।  जाँचपास नगराएर सामान लगेमा भन्सार कार्यालयले भन्सार ऐन २०६४ अनुसार चोरी पैठारी कसुरमा कारवाही गर्ने जनाएको छ । 

भैरहवा भन्सार कार्यालयका सूचना अधिकारी युवराज भट्टराईले दैनिक रुपमा भारत गएर सामान ल्याउनेले अनिवार्य रुपले भन्सार जाँचपास गराएर भन्सार तिनुपर्ने बताए ।  “भारतमा रोजगारी गरेर फर्केकाले नियम अनुसार पाउने सुविधा पाउँछन्,”उनले भने,“दैनिक रुपमा ओहोरदोहर गरेर एक सय रुपैयाँभन्दा बढीको सामान ल्याउनले कर तिर्नुपर्छ।”