काठमाडौं । राज ब्रुअरी र सिम्पल इनर्जीले नवलपरासीस्थित राज ब्रुअरीमा सोलार रूफटप प्रोजेक्टको संयुक्त उद्घाटन गरेका छन् । यो परियोजना राष्ट्रिय ग्रिडमा जडान गरिएको अहिलेसम्मकै सबैभन्दा ठूलो रूफटप सोलार परियोजना भएको कम्पनीले जनाएको छ ।

त्यसका साथै यो नेपालको ब्रुअरी उद्योगकै पहिलो सोलार परियोजना भएको कम्पनीको दाबी छ । नेपालको लागि विश्व प्रसिद्ध बडवाइजर बियरको उत्पादक राज ब्रुअरीले सोलारबाट उत्पादन भएको ऊर्जाले आफ्नो कारखाना सञ्चालन गर्ने र अतिरिक्त उर्जा राष्ट्रिय ग्रिडबाट वितरण हुने बताएको छ ।

कार्यक्रममा बोल्दै राज ब्रुअरीका प्रबन्ध निर्देशक राजबहादुर शाहले ब्रुअरीको ऊर्जा  आवश्यकताहरू पूरा गर्न सोलार रूफटप स्थापना गरी कार्बन फुटप्रिन्ट घटाउनु एक जिम्मेवार संस्थागत नागरिकको स्वच्छ संसारतर्फको प्रयास भएको बताए ।

जावलाखेल ग्रुप अफ इन्डष्ट्रिजका कार्यकारी निर्देशक शशिन जोशीले ब्रुअरीका लागि सोलार ऊर्जा स्थापना गर्न पाउँदा खुसी भएको र यसरी नै जावलाखेल ग्रुपअन्तर्गतका अरु कम्पनीहरुमा पनि सोलार ऊर्जा प्रयोग गर्ने योजना रहेको बताएका छन् ।

यस्तै, सिम्पल इनर्जीका प्रमुख कार्यकारी अधिकृत अपार न्यौपानेले यो प्रोजेक्ट स्वच्छ ऊर्जा र नाफा सँगसँगै जान सक्छ भन्ने उदाहरण भएको बताए ।

प्राइभेट इन्फ्रास्ट्रक्चर डेभलपमेन्ट ग्रुप (पीआईडीजी) कम्पनी इन्फ्राको एसिया र सरल ऊर्जा नेपाल (एसयूएन)को संयुक्त लगानीमा सिम्पल इनर्जीले रुफटप सोलार सिस्टमको डिजाइन, स्थापना र सञ्चालन गरेको हो । ५०० किलोवाटको यो सोलार परियोजनाले वार्षिक लगभग ८४४ मेगावाट स्वच्छ ऊर्जा उत्पादन गर्ने बताइएको छ ।