काठमाडौं । लगानीकर्ताले गत शुक्रबार नेपाल स्टक एक्सचेन्ज (नेप्से)लाई सेयर कारोबार गर्ने ट्रेड मेनेजमेन्ट सिस्टम (टीएमएस) बन्द गर्न माग गरेका थिए । तर, नेप्सेले लगानीकर्ताको मागलाई एक पक्षीय रूपमा सम्बोधन गर्न नसक्ने भन्दै मन्त्रालयसँग छलफल गर्ने बतायो ।

करको विषयलाई लिएर आन्दोलन गर्दै आएका लगानीकर्ताले ब्रोकरहरूलाई पनि टीएमएस खुला नगर्न र खोले त्यसको जिम्मेवारी आफैँ लिनुपर्ने भन्दै दबाब दिएका थिए ।  लगानीकर्ताको यो दबाबलाई अधिकांश ब्रोकरहरुले स्वीकारेका छन् । आइतबार टीएमएस प्राप्त गरेका ५४ वटा ब्रोकरहरूमध्ये ४८ वटाले लगानीकर्ता डाइरेक्ट नेटवर्क एक्सिस (डीएनए) दिएनन् ।

नेपाल स्टक एक्सचेन्जका अनुसार आइतबार सुरुमा ६ वटा ब्रोकरहरूले मात्र डीएनए दिएका थिए । तर, तीमध्ये पनि तीनवटाले केही समयमा नै बन्द गरेका थिए । नेप्सेका सूचना अधिकारी मुराहरि पराजुलीका अनुसार टीएमएस खुला भए पनि ब्रोकरले दिने डीएनए बन्द भएको हो । डीएनए खुला नभएसम्म लगानीकर्ताले सेयरमा अर्डर दिन मिल्दैन ।

त्यस्तै लगानीकर्ताहरूले आर्थिक विधेयक २०८० को दफा २९ लाई लिएर चरणवद्ध आन्दोलन गरिरहेका छन् । अहिले लगानीकर्ताहरू, तिलक कोइराला, रोहन कार्की, नयनसिंह बास्तोला, एसपी चाउलागाईं लगायत अर्थमन्त्री डा. प्रकाशशरण महतसँग छलफलमा बसिरहेका छन् ।

लगानीकर्ताले ब्रोकर कम्पनीहरूमा टीएमएस नखोल्न नोटिस नै टाँसेका थिए । तर, अहिले सबै ब्रोकरहरूले डीएनए खोलेको स्टक ब्रोकर एशोसिएशनका पूर्वअध्यक्ष भरत रानाभाटले जानकारी दिए ।