काठमाडौं । सुनको सिक्री लुटपाट गरेको आरोपमा एकजना पक्राउ परेका छन् । काभ्रेपलाञ्चोकको धुलिखेल नगरपालिका–१, देविटार बस्ने ३० वर्षीय पोण्डे भन्ने विष्णु तामाङलाई मंगलबार प्रहरीले पक्राउ गरेको हो ।

काठमाडौं महानगरपालिका–३२, पेप्सीकोलास्थित गेटवे मन्टेश्वरी स्कुल अगाडि पैदल हिँड्दै गरेकी एक महिलाले घाँटीमा लगाएको चार तोलाको सुनको सिक्री अपरिचित व्यक्तिहरूले लुटपाट गरी फरार भएको प्रहरीले जनाएको छ ।

सोही घटनाको अनुसन्धानको क्रममा काठमाडौं उपत्यका अपराध अनुसन्धान कार्यालय मीनभवनबाट खटिएको प्रहरीले लुटपाटमा संलग्न उनलाई काठमाडौंको गोकणेश्वर नगरपालिका–५, जोरपाटीबाट पक्राउ गरेको हो ।

उनलाई थप अनुसन्धान तथा कारबाहीको लागि प्रहरी वृत्त बानेश्वर काठमाडौं पठाइएको जनाइएको छ ।