काठमाडौं । सार्वजनिक लेखा समितिमा अहिलेसम्म १२१ वटा उजुरी परेको छ ।  

बुधबार दिउँसो सिंहदरबारमा बसेको संघीय संसद् अन्तर्गतको सार्वजनिक लेखा समितिको बैठकमा सांसदहरूलाई जानकारी दिँदै समितिका ज्येष्ठ सदस्य सभापति अर्जुननरसिंह केसीले समितिमा १२१ वटा उजुरी परेको बताए ।

उनले समितिले जुनसुकै विचाराधीन पुराना फाइल खोलेर त्यसमाथि अनुसन्धान अघि बढाउन सक्ने बताए । समितिमा हालसम्म परेका नयाँ र पुराना उजुरीमाथि समितिका सांसदहरूले अध्ययन गर्नसक्ने उनको भनाइ छ ।

उनले भने, “१२१ वटा सबै फाइलहरू माननीय सदस्यहरूले पढ्नुस् । सबै माननीयहरूमा पुगोस् भन्ने मेरो चाहना थियो, त्यो पुगेको छ, यहाँहरूले त्यसलाई अध्ययन गर्नुस्, आवश्यकताअनुसार छलफलका लागि प्रस्ताव गर्नुस् । समितिले उजुरी गर्ने दुवै पक्षलाई राखेर सो बारेमा जानकारी लिन्छ । समितिले जुनसुकै बेला खोलेर छलफल गर्न सकिन्छ ।”

उनले समितिले पक्ष वा विपक्ष कसैलाई पनि आग्रह वा पूर्वाग्रह राखेर हेर्न नहुने बताए ।