काठमाडौं । जनमत पार्टीका सांसद तथा निर्वतमान खानेपानीमन्त्री अब्दुल खानले नागरिकता विधेयक प्रमाणीकरण गरिनु र प्रधानमन्त्रीको भारत भ्रमणलाई जोडेर विश्लेषण गर्नु नश्लीय सोच हुने बताएका छन् । 

बाह्रखरीसँगको कुराकानीमा उनले राष्ट्रपति रामचन्द्र पौडेलले नागरिकता विधेयक प्रमाणीकरण गरेर नागरिकले नागरिकता पाउने संविधानप्रदत्त अधिकार प्रदान गरेको भन्दै पार्टीले यसको स्वागत गर्ने जानकारी पनि दिए । 

“यो नश्लवादी सोच हो, नश्लवादी चिन्तले गर्दा उहाँहरूको यस्तो प्रतिकृया आएको हो,” प्रमुख प्रतिपक्ष दल नेकपा (एमाले) यसलाई प्रधानमन्त्रीको भारत भ्रमणसँग जोडेर प्रतिकृया दिइरहेको छ नि भन्ने प्रश्नमा खानले भने, “मधेसीलाई इंगित गरेर भएका यस्ता कुराहरू ठिक हैन । पहाडी मुलका मानिसहरू पनि नागरिकता नपाएर रोएर बसेका छन् । हिमाल पनि उस्तै समस्या छ ।”

उनले नागरिकतासम्बन्धी समस्या भारतको वा अन्य छिमेकी मुलुकको नभएर नेपालभित्र रहेका नेपाली नागरिकहरूको समस्या भएको भन्दै यसलाई अतिरञ्जित गर्न नहुने धारणा राखे । नागरिकता विधेयकमा एमालेले द्वेध चरित्र साधेको भन्दै आफूले गरे ठिक अरूले गरे बेठिक भन्ने मानसिकता एमालेले त्याग्नुपर्ने बताए ।

उनले संसद्ले पास गरेको यो विधेयक अघिल्लो राष्ट्रपतिले नै प्रमाणीकरण गरेको भए जनता अनागरिक बनेर संवैधानिक अधिकार प्राप्तिको अवसरबाट वञ्चित हुन नपर्ने धारणा राखे ।

“दुवै सदनले पास गरेको, दुईपटक पास गरेको विधेयक राष्ट्रपतिले नैतिकताको आधारमा गर्नुपर्ने हो । यो जनमत पार्टीले स्वागत गर्छ,” उनले भने, “यो अघिल्लो राष्ट्रपतिले नै प्रमाणीकरण गर्नुपर्ने थियो । तर, उहाँले गर्नुभएन । त्यसकारण विधेयक प्रमाणीकरणमा ढिलाइ भयो । तर, ढिलै भए पनि जे भयो, राम्रो भयो ।”

सांसद खानले संविधानको धारा १० र ११ को ३ ले नागरिकता पाउने हक दिएको भन्दै यसको पूर्ण कार्यान्वयनमा जोड दिए ।