विराटनगर । कोसी प्रदेश नाम खारेजी एवं पुनः नामकरण संयुक्त संघर्ष समितिले यही जेठ १४ गतेको प्रदर्शनअघि र त्यसपछि पक्राउ परेका सबै नेता–कार्यकर्तालाई रिहा गर्न माग गरेको छ ।

उक्त आन्दोलनका क्रममा प्रदेश राजधानी विराटनगर र अरू भागबाट पक्राउ परेका मध्ये २६ जना अझै प्रहरी हिरासतमा छन् । उनीहरूविरुद्ध मुद्दा चलाउने तयारी भएसँगै बिनासर्त छाड्न संघर्ष समितिले माग गरेको हो ।

मंगलबार (आज)सम्म सबैलाई बिनासर्त नछाडिए भोलिदेखि प्रदेशव्यापी आमहड्तालको घोषणा गरिने संघर्ष समितिले चेतावनी दिएको छ ।

“२०८० जेठ १६ गते कार्यालय समयभित्रमा बिनासर्त रिहाइ नगरेमा २०८० जेठ १७ गते बिहानदेखि अनिश्चितकालीन प्रदेशव्यापी आमहड्ताल गर्न बाध्य हुने यसै विज्ञप्तिमार्फत चेतावनी दिन चाहन्छौँ,” विज्ञप्तिमा उल्लेख छ ।

गएको फागुन १७ गते प्रदेश नम्बर–१ को नाम कोसी पारित भएसँगै पहिचानको आधारमा नाम नआएको भन्दै त्यसको विरोधमा आन्दोलन चर्किएको छ । आन्दोलनका क्रममा गएको आइतबार विराटनगरमा सुरक्षाकर्मी र प्रदर्शनकारीबीच प्रदेशसभा सचिवालयनजिकै देवकोटा चोक र आसपासमा झडप भएको थियो । त्यसक्रममा आन्दोलनकारी र सुरक्षाकर्मी घाइते समेत भएका थिए । आन्दोलनकारीतर्फ ११ जना गम्भीर घाइते भएको समितिले जनाएको छ ।