काठमाडौं । राष्ट्रिय प्रजातन्त्र पार्टीका प्रमुख सचेतक ज्ञानबहादुर शाहीले बजेटलाई नराम्रो भन्न नहुने बताएका छन् । उनले बजेट त्यति नराम्रो नभएको र ठिकै बजेट आएको बताए ।

आगामी आर्थिक वर्षको बजेट प्रस्तुत भएपश्चात् सोमबार सञ्चारकर्मीहरुसँग कुराकानी गर्दै उनले  सांसद विकास कोष आवश्यकता नभएको बताए ।

“सांसद विकास कोष थोपरिदिएरमात्र उम्किन पाइँदैन । यसलाई अडिट गर्नुपर्ने प्रावधान राख्नुपर्छ । निर्वाचन क्षेत्र मैले मात्र विरोध गरेर हुने होइन । स्थानीय तह भएपछि आवश्यकता चाहिँ थिएन,” उनले भने ।

उनले बजेट कार्यान्वयन हुनुपर्नेमा जोड दिए ।

“कार्यान्वयन गर्नमा ध्यान दिनुपर्छ । कृषिमा आयात रोक्नुपर्छ भन्ने थियो, त्यो हुन सकेन । हामी प्रतिपक्ष भए पनि यसका सबल पाटोहरु पनि छन्, कार्यान्वयनमा ध्यान दिनुपर्छ,” उनले भने ।