काठमाडौं । पछिल्ला महिनाहरुमा नेपालमा दुईपाङ्ग्रे विद्युतीय सवारीसाधन (ईभी)को आयात उल्लेख्य रुपमा बढेको छ । गत आर्थिक वर्षको १० महिनाको अवधिको तुलनामा चालु आर्थिक वर्षको सोही अवधिमा दुईपाङ्ग्रे ईभीको आयात झन्डै तीन गुणाले बढेको छ ।

तर, आयात बढे पनि ब्रिकी उत्साहजनक नभएको र बढी सवारी गोदाममै रहेको व्यवसायीको भनाइ छ ।

भन्सार विभागको तथ्यांकअनुसार चालु आर्थिक वर्ष २०७९/०८० को १० महिना वैशाख मसान्तसम्म ८४ करोड ७४ लाख १८ हजार रुपैयाँ बराबरका ६ हजार ६०४ दुईपाङ्ग्रे ईभी भित्रिएका छन् । यसबाट सरकारले २२ करोड १४ लाख ५७ हजार रुपैयाँ राजस्व उठाएको छ । 

गत आव २०७८/०७९ को यसै अवधिमा दुई हजार ४३३ वटा दुईपाङ्ग्रे विद्युतीय सवारीसाधन भित्रिएका थिए । २६ करोड ७६ लाख २२ हजार मूल्य बराबरका ती दुईपाङ्ग्रे ईभीबाट सरकारलाई ६ करोड ४९ लाख ८७ हजार रुपैयाँ राजस्व उठेको थियो ।

दुईपाङ्ग्रे विद्युतीय मोटरसाइकल एवं स्कुटरको आयात राम्रै भए पनि बिक्री खासै नभएको नाडा अटोमोबाइल्स एसोसिएसन अफ नेपालका अध्यक्ष ध्रुव थापाको भनाइ छ ।

‟दुईपाङ्ग्रे राम्रै होला भन्ने सोचेर धेरैले लिएर आएका छन् । तर, ‘सेल्स’ जति हुनुपर्ने हो, छैन । आयात भएको छ, ‘स्टक’मा छ । नयाँ नयाँ कम्पनीहरु बढी आएको हुनाले पनि आयात धेरै देखिएको छ,” नाडाका अध्यक्ष थापाले भने ।

पहिलाको तुलनामा बिक्री बढे पनि कार ‘सेजमेन्टको’ जस्तो उत्साह दुईपाङ्ग्रेमा नभएको उनको भनाइ छ ।

‟पहिलाको भन्दा बिक्री पनि बढी नै हो । धेरै कम्पनी आउँदा ‘पुस सेल’ नै पनि हुन्छ । पहिलो हिसाबले बिक्री पनि नभएको होइन, राम्रै छ । तर, कार सेगमेन्टमा जुन खालको ‘रफ्तार’ छ, त्यो दुईपाङ्ग्रेमा अझै पनि मान्छेले विश्वास गरिसकेका छैनन् ।”

खासगरी दुईपाङ्ग्रे ईभीमा कम रेन्ज भएका कारण बिक्री कम देखिएको उनको आकलन छ ।

‟खास रेन्जका कारण मान्छेलाई ‘ट्रस्ट’ नभएको हो । मान्छेहरु बाइक–स्कुटर लिइसकेपछि भ्यालीबाहिर पनि जान खोज्छन् । तर, त्यसका लागि ‘पोसिबल’ कुनै पनि स्कुटर–बाइकहरु भएको छैन,” उनले भने, ‟सिटीभित्र चलाउनलाई भयो । सिटीबाहिर जान नभएका कारण यस्तो हो ।”

बढी रेन्जका दुईपाङ्ग्रे ईभी आएमा त्यस्ता ईभीमा मान्छेहरुको चासो बढ्ने देखिएको उनको भनाइ छ ।

आर्थिक वर्ष २०७७/०७८ को १० महिना अर्थात् वैशाख मसान्तसम्मको तुलनामा भने यो आवमा करिब पाँचगुणाले आयात बढेको छ ।

त्यसवर्ष १४ करोड ६० लाख २१ हजार मूल्य बराबरका एक हजार ४०६ वटा विद्युतीय मोटरसाइकल तथा स्कुटर भित्रिएका थिए । ती विद्युतीय दुईपाङ्ग्रे सवारीसाधनबाट सरकारलाई तीन करोड ५४ लाख ७७ हजार रुपैयाँ राजस्व उठेको थियो ।