काठमाडौं । रूसी निजी सेना कम्पनी वाग्नर ग्रुपका प्रमुखले बाख्मुट सरह कब्जा गर्न चलेको युद्धमा २० हजार भन्दा बढी आफ्ना सेनाको मृत्यु भएको बताएका छन् ।
युक्रेनविरुद्ध रूसले सुरु गरेको १५ महिना लामो युद्ध लड्न भर्ना गरिएका ५० हजार मध्ये २० प्रतिशतको मृत्यु पूर्वी युक्रेनी सहरमा भएको उनको भनाइ छ ।
यो तथ्यांक मस्कोले युद्धमा ६ हजार भन्दा बढी सेना गुमाएको भन्ने दाबीको विपरित छ । सन् १९७९ देखि सन् १९८९ सम्मको अफगानिस्तान युद्धमा सोभियत संघले गुमाएको अनुमान गरिएका १५ हजार सेना भन्दा यो संख्या बढी हो ।
सन् २०२२ को फेब्रुअरीमा रूसले सुरू गरेको आक्रमणपछि युद्धमा आफ्ना कति सैनिकको ज्यान गएको छ भन्ने कुरा युक्रेनले सार्वजनिक गरेको छैन ।
बाख्मुटमा करिब १० महिनासम्म चलेको भयानक लडाइँमा दशौं हजार सेनाको ज्यान गएको विश्लेषकहरूको विश्वास छ । त्यहाँ मारिनेमा निकै थोरै तालिम पाएका सेनाहरू समेत रहेको ठानिएको छ ।
कीभको सेना यसका पश्चिमी सहयोगीहरूको हतियार र तालिमबाट बलियो भएसँगै युक्रेनलाई असैनिकीकरण गर्ने रूसको आक्रमणको लक्ष्य उल्टो भएको छ ।
वाग्नर ग्रुपका प्रमुख येभगेनी प्रिगोजिनले क्रेमलिन समर्थक राजनीतिक रणनीतिकार कन्स्टान्टिन डोल्गोभसँग मंगलबार प्रकाशित अन्तर्वार्तामा यस्तो बताएका हुन् ।
मंगलबारको अन्तर्वार्तामा उनले आगामी हप्ताहरूमा कीभले सुरु गर्ने ठानिएको काउन्टर अफेन्सिभले पश्चिमी सहयोगका कारण रुसी सेनालाई दक्षिणी र पूर्वी युक्रेनसँगै क्रिमियाबाट बाहिर निकाल्न सक्ने सम्भावना रहेको बताएका छन् । एपी
