काठमाडौं । वरिष्ठ नेत्र चिकित्सक डा. सन्दुक रुइतको जीवनी कक्षा १० को नेपाली किताबबाट हटाएको विषयको यतिखेर सामाजिक सञ्जालदेखि सदनसम्मै चर्चा भएको छ ।

प्रेरणादायी व्यक्तित्वको जीवनी हटाइनुलाई पाठ्यक्रम विकास केन्द्रको गलत निर्णयको रूपमा टिप्पणी गर्न थालिएको छ । विभिन्न विद्यार्थी संगठनदेखि सांसदहरूले समेत यसबारे प्रश्न उठाएका छन् ।

कहाँबाट कहाँ सारियो
यसअघि कक्षा १० को नेपाली किताबको पाठ ३ मा ‘सन्दुक रूइत’ शीर्षकको उनको जीवनी पढाइ हुन्थ्यो । पाठ्यक्रम विकास केन्द्रले पाठ्यक्रम परिमार्जन गरिएको कन्टेन्टको ढाँचा मात्रै परिवर्तन गरेको जनाएको छ । सो क्रममा कक्षा ७ को अंग्रेजी, कक्षा ८ को नेपाली र कक्षा १० को सामाजिक तथा विज्ञान विषयमा डा. रुइतबारे सामग्री समावेश गरिएको छ ।

डा. रुइतको बहुआयामिक व्यक्तित्वलाई अझै उजागर गर्न नै चारवटा विषयमा उनीबारे पाठ्य सामाग्री समेटिएको पाठ्यक्रम विकास केन्द्रका निर्देशक डा. बाबुराम ढुंगाना बताउँछन् ।

अहिले कसरी राखिएको छ ?
अहिलेको पाठ्यक्रममा कक्षा ७ को अंग्रेजी विषयमा डा. रुइतको छोटो पेसागत चिनारी समेटिएको छ । त्यस्तै, कक्षा ८ को नेपालीमा सिर्जना र परियोजना कार्य अन्तरगत डा. रुइतबारे बुँदागत जानकारी राखी त्यसका आधारमा जीवनी तयार पार्न दिइएको छ ।

त्यस्तै, कक्षा १० को सामाजिक विषयमा डा. रूइतले पाएको इसा अवार्डबारे जानकारीसहितको छोटो सामग्री राखिएको छ । कक्षा १० को विज्ञान तथा प्रविधि विषयमा भने मोतिबिन्दुबारे जानकारी दिँदै डा. रुइतले इन्ट्राअकुलर लेन्सको विकास गरेको विषय समावेश गरिएको छ ।