जनकपुरधाम । महोत्तरी प्रहरीले एक सय किलो गाँजासहित दुईजनालाई पक्राउ गरेको छ ।

एकडारा गाउँपालिका–३, अजमरपट्टीबाट एक सय केजी गाँजासहित दुईजनालाई प्रहरीले पक्राउ गरेको हो ।

प्रदेश ३–००१ क ०२६९ नम्बरको ट्रकमा लोड गरी लुकाइछिपाइ ल्याउँदै गर्दा उक्त परिमाणमा गाँजा बरामद गरिएको महोत्तरीका प्रहरी नायव उपरीक्षक दिलिप कुमार गिरीले जानकारी दिए ।

उनका अनुसार ट्रकका चालक मकवानपुरको भिमफेदी गाँउपालिका–१ का २९ वर्षीय रुपेश गोले र सोही ठाउँका सहचालक २६ वर्षीय अनिल पाख्रिनलाई नियन्त्रणमा लिइएको छ । उनीहरुमाथि जिल्ला अदालत महोत्तरीबाट म्याद थप गरी अनुसन्धान सुरु भएको छ ।

प्रहरीका अनुसार महोत्तरीको सीमा हुँदै गाँजा भारत पु¥याउन लागिएको थियो । पछिल्लो समय महोत्तरी सीमा भएर अवैध कारोबार निकै बढेको गुनासो छ ।