काठमाडौं । मदनकृष्ण श्रेष्ठका नेवारी गीत उक्त समुदायमा त लोकप्रिय छ नै । त्यो समुदायको चौघेरा नाघेर अरूले पनि उत्तिकै रुचाएका छन् । तिनै गीत सुनेर हुर्किए, किरण केसी । ती कालजयी गीत सुनेर उनलाई लोभ लाग्थ्यो । यस्तै गीत गाउने पाए ? किरणको मनमा रहरले घर गर्‍यो ।

पाक्कपुक्क बोलिहाल्ने, मन लागेको भनिहाल्ने स्वभावका उनले मदनकृष्णलाई आग्रह गरे– दाइ, मलाई पनि एउटा कालजयी हुने नेवारी गीत लेखिदिनुपर्‍यो । 

मदनकृष्णले भने– हुन्छ । 

दुई महिनामा मदनकृष्णले एउटा होइन, किरणलाई आठ गीत लेखेर पठाइदिए । त्यसमध्येको एउटा गीतले भन्छ– तलाईं देखेर तेरो नेवारी गीत गाइरहन मन लाग्छ ।

किरणले ‘तपाईंको जस्तै युगयुगान्तर बाँचिरहने गीत मलाई चाहियो’ भनेका थिए । मदनकृष्णले किरणको मनमा खेलिरहेको भावनालाई नै गीतमा उतारिदिए । आठमध्ये त्यही गीतचाहिँ किरणलाई मन पर्‍यो । मदनकृष्णले नै संगीत भरिदिए । र, किरणले गाए–"> छन्त खँ साँ निरोँ...।

गीतको भिडियोको सुरुमा किरणले मदनकृष्णको सम्मानमा उनका दुइटा लोकप्रिय गीतलाई स्थान दिए । त्यसपछि आफ्नो गीत राखे । भिडियोमा देखिन पनि किरणले छोडेनन् । उनलाई साथ दिइन् शोभा महर्जनले । भिडियो निर्देशन गरे सुरेन्द्र तुलाधरले ।

किरण क्षेत्रीको छोरो । नेवारी गीत गाए । गीतले नेवारी संस्कार र संस्कृतिको प्रशंसा गरेको छ । “गीत त मैले गाएँ, तर सहज भएन । मदन दाइले मलाई बालखलाई हात समाएर डोर्‍याएर गाउन लगाएजस्तो भयो । मलाई उहाँले एक/एक शब्दमा रोकेर यसरी गाऊ, यसरी गाउनुपर्छ भन्दै सिकाउनुभयो,” किरण भन्छन्, “तिमीले गाउन सक्छौ, स्वर राम्रो सुनिएको छ, तर अझै राम्रो मिठास निकाल, अझै बढी फिल गरेर गाऊ भनेर सम्झाउनुभयो । नौ घण्टाभन्दा धैरै लाग्यो रेकर्डिङमा ।” यो गीतको भिडियोमा मदनकृष्णले पनि अभिनय गरेका छन् ।

गएको शनिबार किरणले आफ्नै युट्युब च्यानलबाट गीत सार्वजनिक गरे । उनले गीत सार्वजनिक गर्न काठमाडौंमा औपचारिक कार्यक्रम नै आयोजना गरेका थिए । त्यहाँ उनले ‘छन्त खँ साँ निरोँ...’ मात्र होइन, अरू दुइटा गीत पनि सार्वजनिक गरे । ती दुई गीत भने युट्युबमा आउन बाँकी छ ।

पारस अधिकारीले एक दिन अमेरिकामा किरणका छोरा सुदीपलाई भनेछन्– तिम्रो बुवा त कलाकार, मेरो ममीले एउटा स्याड सङ लेख्नुभएको छ, भिडियो बनाएर तिम्रो बुवाले खेल्दिनुहुन्थ्यो कि !

यसरी किरणसँग प्रभा अधिकारीको गीत ठोक्किन आइपुग्यो । प्रभाको रचना रहेको ‘ए रात...’ बोलको गीत सुरेश ढुंगानाले गाएका छन् । सत्यस्वरूपले संगीत भरेको गीतको भिडियो सुदन केसीले निर्देशन गरेका छन् । किरणसँग स्क्रिन सेयर गरेकी छन्, शर्मिला मल्लले ।

प्रभाले यो सांसारिक संसारलाई बिदाइको हात हल्लाइसकिन् । यो गीतमार्फत उनी सांसारिक संसारमा रहिरहने किरण बताउँछन् । 

० ० ०

किरणले मदनकृष्णलाई भनेका थिए– दाइ, तपाईंको ‘हे भगवान् मेरो खल्तीको घाउ...’ जस्तै मलाई पनि एउटा प्यारोडी गीत बनाइदिनुपर्‍यो । 

मदनकृष्णले उसैगरी भने– हुन्छ ।

ती आठमा उनले ‘होला होला भन्दै...’ बोलको प्यारोडी गीत समेत लेखिदिए । शब्द मात्र होइन, संगीत पनि भरिदिए । योसहितका गीत किरणले शनिबार सार्वजनिक गरेका हुन् । किरण स्वयंको स्वर रहेको गीतको भिडियोमा मदनकृष्ण आफैँ देखिएका छन् । भिडियो निर्देशन सुदन केसीले नै गरेका छन् । जे काम गर्न लाग्दा पनि सफल होला/नहोला भन्ने शंका गर्ने मानवीय प्रवृत्ति यो गीतको मुख्य कथा हो ।

‘ए रात...’ जेठ १९ गते किरणको जेठो नाति क्यानलियो केसीको जन्मदिनको अवसर पारेर युट्युबमा सार्वजनिक गरिँदै छ ।

‘होला होला होला...’ को भिडियो किरणले आफ्नो जन्मदिनको अवसर पारेर असार १५ गते आफ्नै युट्युब च्यानलमार्फत सार्वजनिक गर्ने तयारी गरेका छन् ।

किरण पछिल्लो समय म्युजिक भिडियोमा धेरै आउने कलाकारमध्ये हुन् । कुनै गीतमा बुवा चाहियो, किरण । अलि मात्तिएको मान्छे चाहियो, किरण । नाच्न जान्ने अधबैँसे मान्छे चाहियो, किरण । कमेडियन चाहियो, किरण । रमाइलो मान्छे चाहियो, किरण । त्यसैले हिजोआज धेरै म्युजिक भिडियोमा किरण देखिन्छन् । त्यसो त उनी अहिले मात्र होइन, पहिला पनि गीतमा प्रशस्तै देखिने अनुहार हुन् ।

शिव रेग्मी, अशोक शर्मा, राजकुमार राईलगायत निर्माताले सिनेमामा किरणका लागि भनेर छुट्टै गीत बनाउँथे । एउटै चलचित्रमा चार/पाँच गीत हुन्थे । त्यसमा पनि कमेडियनको भूमिकामा किरण हुँदा उनका लागि एउटा गीत छुट्ट्याइएकै हुन्थ्यो ।

चलचित्रका गीतमा रौसे किरण, तीजका गीतमा पनि अफर आउन थाल्यो । यो क्रम बाक्लिँदै गयो । परिणाम, हरेक तीजमा किरण नाचेका गीत आउन थाले । यसरी सुरु भएको किरणको डान्सिङ यात्रा म्युजिक भिडियोसम्म छाएको छ ।

कोरोना संक्रमणको समयमा घरमै बसेका बेला किरण टिकटकमा रत्तिए । उनको टिकटक मोहलाई अरूले मन पराए । त्यो पनि उनलाई म्युजिक भिडियोमा बाक्लै लिने एउटा कारण बन्यो ।

किन लिन्छन् किरणलाई म्युजिक भिडियोमा ? उनकै शब्दमा– किरण फ्लेक्जिबल छ ।

निर्देशकले जस्तो भन्यो त्यस्तै डान्स गरिदिन्छन् । उनको डिमान्ड ठूलो छैन । सुटिङमा रमाइलो गर्छन् । काम गर्ने वातावरण रमाइलो बनाइदिन्छन् । त्यो पनि उनलाई रुचाइनुको कारण हो ।

किरण राजनीतिक विषयमा चासो राख्छन् । आफ्नो मनमा लागेका कुरा निशंकोच बताउँछन् । उनी कुनै राजनीतिक दलका कार्यकर्ता भने होइनन् । एमाले, माओवादीलगायत दलले बोलाउँदा नगएका उनी रवि लामिछानेको राष्ट्रिय स्वतन्त्र पार्टीको आग्रहलाई पनि बेवास्ता गरे । कुनै राजनीतिक दलमा छैनन्, त्यसैले त उनी निर्धक्क बोल्न सक्छन् । आफ्नो कलाका माध्यमबाट व्यंग्य गर्न सक्छन् । यो स्वतन्त्रता कुनै दलविशेषको झोला बोकेर हिँडेपछि कहाँ पाइन्छ !

पछिल्लो समय नक्कली भुटानी शरणार्थी प्रकरणका कारण समग्र नेपाली राजनीति र राजनीतिज्ञप्रति नै आम नागरिकले प्रश्न उठाइरहेका छन् । यो प्रकरणमा पूर्वउपप्रधानमन्त्री टोपबहादुर रायमाझी र पूर्वगृहमन्त्री बालकृष्ण खाँणलगायत व्यक्ति समातिएका छन् । यही सन्दर्भमा उनी टिप्पणी गर्छन्–नेताहरूले मिलेमतोमा भित्रभित्रै देश सखाप पारिसकेका छन् ।

अन्तर्राष्ट्रियजगत्मा नेपालको शिर झुकेको बताउँदै किरण भन्छन्, “अनुसन्धानले को कति दोषी भोलि देखाउला, तर प्रहरी अनुसन्धानमा नै राजनीतिक हस्तक्षेप नहोला भन्न कहाँ सकिन्छ र ?”

कलाकारका हजार व्यंग्य र नागरिकका हजार गुनासाले पनि नसुध्रिने भ्रष्टको पक्षबाट वकालत गर्ने वकिल नै नहुनुपर्ने किरणको धारणा छ । उनी भन्छन्, “म त भन्छु– यस्ता भ्रष्ट नेताको पक्षबाट हामी वकिलले पनि मुद्दा नलडौँ न, ता कि हामी कति भ्रष्ट भइसकेछौँ र हामीप्रति जनताको वितृष्णा कति रहेछ भन्ने अनुभूत गरून् ।”

वकिलहरूको छाता संस्था नेपाल बार एसोसिएसनले औपचारिक रूपमै भ्रष्ट नेताहरूका पक्षबाट वकालत नगर्ने निर्णय गर्नुपर्नेमा उनी जोड दिन्छन् । कलाका माध्यमबाट भ्रष्ट नेता र प्रवृत्तिको विरोध र व्यंग्य गर्न आफूले नछोड्ने उनको प्रतिबद्धता छ । सिनेमामार्फत आफूले पटक–पटक राजनीतिक विषय उठाउँदै आएको उनी सुनाउँछन् ।

“राजनीतिक विषयका सिनेमा त्यति धेरै दर्शकले नरुचाएको हो कि जस्तो लाग्छ । त्यसैले करोडौँ रुपैयाँ लगानी जोखिममा राख्ने कि नराख्ने भन्ने प्रश्न पनि आउँछ,” किरण गफको बिट मार्छन्, “तर, जसरी हुन्छ, हामीले भ्रष्टारमुक्त देश बनाउनुपर्छ । हाम्रो शिर उचो राख्नुपर्छ । यसका लागि कसले के योगदान गर्नुपर्छ, हामी सबैले आ–आफ्नो ठाउँबाट गरौँ ।”

भ्रष्टाचारका खबर सुनेर दिक्क लाग्ने गरेको भन्दै किरण भन्छन्, “यी दल भन्दा त विप्लभ समूह ठीक छ भनेर जनताले भन्ने बेला भयो ।” भ्रष्टाचार जसले गरेको छैन र त्यसको मोह राखेको छैन जनताले त्यही दललाई रुचाउने उनको भनाइ छ । भ्रष्टाचारबाट देशलाई मुक्त गराउने दलको खोजीमा जनता रहेको र त्यसकै परिणामस्वरुप रवि लामिछानेको रास्वपाको उदय भएको किरणको बुझाइ छ । दलहरु अब पनि नसच्चिए आउँदो निर्वाचनमा रास्वपाले सबै दललाई बडार्ने उनको विश्वास छ ।