काठमाडौं । पूर्वगृहमन्त्री बालकृष्ण खाँणको बयान जिल्ला सरकारी वकिल कार्यालय काठमाडौंमा आज पनि जारी रहने भएको छ । नक्कली भुटानी शरणार्थी प्रकरणमा मुछिएपछि खाँणलाई गत वैशाख २७ गते प्रहरीले पक्राउ गरेको थियो । 

खाँणको बयान सोमबार पनि लिइएको थियो । तर, बयानको क्रममा उनले स्वास्थ्य अवस्था ठीक नभएको बताएपछि बाँकी बयान आज लिन लागिएको हो ।

खाँणलाई आफू मन्त्री भएको समयमा भुटानी शरणार्थी प्रमाणीकरण तथा तेस्रो देशमा पुनःस्थापनाका लागि बनेको कार्यदलको सक्कली प्रतिवेदन गायव पारेको र नक्कली प्रतिवेदन कार्यान्वयन गर्दै त्यसवापत अनुचित लाभ लिएको आरोप लागेको छ । 

खाँणले भने आफ्नो संलग्नता अस्वीकार गर्दै आएका छन् ।