काठमाडौंमा हावाहुरी र असिनासहित वर्षा

देश

आइतबार, वैशाख ३१, २०८०

काठमाडौं । काठमाडौंमा भिषण हावाहुरी सँगै वर्षा भएको छ ।

काठमाडौं उपत्यकाका विभिन्न स्थानमा हावाहुरीसँगै असिना परेको हो । हावाहुरी र वर्षासँगै उपत्यकाका विभिन्न स्थानमा विद्युत् प्रशारणसमेत अवरुद्ध भएको छ ।

यसअघि, आइतबार मध्याह्न बाह्रखरीसँग कुरा गर्दै मौसम पूर्वानुमान महाशाखा मौसमविद् सन्जीव अधिकारीले क्षणिक वर्षा हुने बताएका थिए ।

“एकदमै क्षणिक वर्षा हुन्छ । काठमाडौंसहित आसपास, नुवाकोट, रसुवा, कोसी प्रदेश र गण्डकी प्रदेशका पहाडी भूभागमा वर्षा हुने सम्भावना छ,” उनले भनेका थिए, “आज बिहान पनि मकवानपुरमा वर्षा भएको थियो ।”

देशमा पश्चिमी र स्थानीय वायुको प्रभाव रहेको र त्यसैले वर्षा गराएको उनले बताएका थिए ।

“पश्चिमी वायु र स्थानीय वायुको प्रभावले नै वर्षा गराउने हो,” उनले भने, “मोखाले धेरै पानी गराउने अवस्था छैन ।”

‘मोखा’ले कोसी र मधेस प्रदेशमा बादल भने बढाउने उनले बताए । “मोखाले पानी नपारे पनि बदलीचाहिँ गराउँछ । कोसी प्रदेश र मधेस प्रदेशमा बादल बढाउँछ,” उनले भने, “त्यसो हुँदा तापक्रम घट्छ ।”