काठमाडौं । उदयपुर प्रहरीले सामाजिक सञ्जालमा चिठ्ठा परेको भन्दै ठगी गर्ने तीनजनालाई पक्राउ गरेको छ । 

जिल्ला प्रहरी कार्यालय उदयपुरले आइतबार पत्रकार सम्मेलन गरेर विभिन्न प्रलोभन देखाएर सामाजिक सञ्जालमा ठगी गरेको आरोपमा पक्राउ परेका कटारी–३ का उज्जवल थापा मगर, चितवन रत्ननगर–२ का सुशिल श्रेष्ठ र कटारी नगरपालिका ३ का विशाल थापा मगरलाई सार्वजनिक गरेको हो ।

पक्राउ परेका व्यक्तिहरूको समूहले त्रियुगानगरपालिका ३ का उदय राईलाई सामाजिक सञ्जाल ह्वाटसएपमा २५ लाखको चिठ्ठा पर्‍यो भन्दै रकम प्राप्त गर्न कर तिर्न भनेर २२ लाख २० हजार ठगी गरेको जिल्ला प्रहरी कार्यालयले जनाएको छ ।

उदयपुरका प्रहरी प्रमुख ज्ञानेन्द्रप्रसाद फुयालका अनुसा ठगी गर्ने समूहले विभिन्न व्यक्तिको बारेमा अध्ययन गर्ने, सामाजिक सञ्जालमा विभिन्न प्रलोभनसहितको लिङ्क पठाउने, चिठ्ठा परेको भनेर कल गर्ने र चिठ्ठा वापतको रकम प्राप्त गर्ने करबापतको पैसा ईसेवा, आईएमी पे, कनेक्ट आईपीएसलगायतबाट पैसा पठाउन लगाएर ठगी गर्ने गरेको पाइएको छ । 

प्रहरीका अनुसार ठगी गर्ने समूहले विभिन्न जिल्लाबाट पैसा प्राप्त गरेको रेकर्ड फेला परेकाले ठगीमा पर्नेको संख्या धेरै हुन सक्ने जनाएको छ । 

पक्राउ परेका तिनजनालाई नै जिल्ला अदालतबाट मुलुकी अपराध संहिता, २०७४ को ठगी, अपराधिक विश्वासघात तथा आपराधिकलाभ सम्बन्धी कसुरमा ६ दिनको म्याद थप गरी अनुसन्धान सुरु गरेको बताएको छ ।