काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछानेले प्रधानमन्त्रीलाई नक्कली भुटानी शरणार्थी प्रकरणमा अनुसन्धान अघि बढाएकोमा धन्यवाद दिएका छन् ।
प्रधानमन्त्रीको सरकारी निवास बालुवाटार पुगेर शुक्रबार सभापति लामिछानेले भ्रष्टाचार नियन्त्रणको अभियानमा आफ्नो सधै साथ हुने भन्दै सरकार ढल्छ कि भनेर चिन्ता नलिन आग्रह गरेका छन् ।
“भ्रष्टाचारका फाइल खोल्दा सरकार ढल्छ कि भनेर चिन्ता नलिनुस् भनेर मैले भनेको छु,” सभापति लामिछानेले बाह्रखरीसँग भने, “अहिलेको छानबिन अघि बढाउनुस् र अरु फइलहरू पनि खोल्दै जानुस भनेको छु ।”
उनले भ्रष्टाचार नियन्त्रण दलहरूको साझा एजेण्डा हुनुपर्ने भन्दै आफ्नो दलले सधै त्यसको समर्थन गर्ने बताए । उनले तीन दलका नेताहरू मात्र बस्ने अनि छलफल, निर्णय र सहमति गर्ने कुराले सकारात्मक सन्देश नदिएको भनेर प्रधानमन्त्रीको ध्यानाकर्षण समेत गराएका छन् ।
“तपाईले तीन दलका नेताहरूको मात्र बैठक राख्दा त्यसले राम्रो सन्देश दिएको छैन,” लामिछानेले भेटपछि भने, “चौथो दल रास्वपा पनि छ । अरु दलहरू पनि छन् । उनीहरूलाई पनि समेट्दा त्यसले राम्रो सन्देश जान्छ ।”