काठमाडौं । नेकपा (एमाले)का अध्यक्ष केपी शर्मा ओलीले भ्रष्टाचारविरुद्ध बोल्दा अमरेशकुमार सिंहविरुद्ध अख्तियारमा उजुरी दिइएको भन्दै सरकारले विपक्षीको मुख थुन्ने काम गरेको आरोप लागाएका छन् ।

बिहीबार च्यासलमा पार्टीको केन्द्रीय कमिटी बैठकमा उनले विपक्षीको मुख थुनेर भ्रष्टाचारको ढाकछोप नहुने बताए ।

“अमरेशले भ्रष्टाचारविरुद्ध बोल्यो भनेर अख्तियारमा उजुरी दिइयो,” ओलीले भने, “विपक्षीले भ्रष्टाचारको विरुद्धमा बोल्यो भने मुख थुन्ने ?”

उनले अहिले पनि सरकारले विभिन्न नाममा भ्रष्टाचारका धन्दा चलाइरहेको आरोप लगाए । विगतदेखि एमाले भ्रष्टाचारको विरुद्धमा रहेको भन्दै उनले थप खरो रूपमा उत्रने समय आएको बताए ।

“पञ्चायतकालमा हामी शासनसत्ताको नजिक पनि पुग्दैनथ्यौँ । भ्रष्टाचार देख्थ्यौँ । तर, व्यवस्थाकै विरोधमा हामी केन्द्रित थियौँ,” ओलीले विगत सम्झँदै भने, “बहुदल आएपछि अनेक प्रकारका भ्रष्टाचार आउन थाले । कांग्रेसमा लागेबापत पैसा बाँड्न थालियो ।”

उनले आफूलाई पनि जेल बसेको भन्दै पैसा आएको तर फिर्ता गरेको बताए ।

“मलाई पनि ७५ हजार दिइएको थियो । त्यस बेलाको त्यो पैसाले यतैतिर पनि एक रोपनी जग्गा आउँथ्यो । अहिले पनि साँच्चै जाँच गर्ने हो भने त्यति बेला राहत बाँडिएकाहरू पीडित थिएनन् । मैले त्यो समितिको खातामा पैसा फिर्ता गरेको थिएँ,” उनले भने, “धेरैलाई त्यसरी पैसा बाँडिएको थियो । ०७५ हजारमा २५ हजार कमिसन आएर ५० हजार मात्र दिइन्थ्यो । तपाईंहरूले दिएको पैसा भ्रष्टाचारीहरूको लाइनमा उभिनुपर्ने देखेर मैले फिर्ता गरेँ ।”

उनले पछिल्लो समय त्यस्तै प्रकारका भ्रष्टाचारको स्वरूप देखिएको बताए ।

“पछिल्लो समयमा त अयोग्य लडाकुलाई बाँड्ने भनिएको छ । घाइते अपांगलाई बाँड्ने भनिएको छ । अनेक नाममा भ्रष्टाचार आइरहेका छन्,” उनले भने, “दुई लाख बाँड्ने भनेर सरकार उद्दत छ । बहिर्गमित लडाकुलाई बाँड्ने भनेर । माओवादीले एक लाख ५० हजार कार्यकर्तालाई दिने, बाँकी आफैँ राख्ने । राज्यको ढुकुटी रित्याएर व्यक्ति वा संस्थाले लिन मिल्छ ? त्यो भ्रष्टाचार होइन ?”